Shillong, Nohprah, 28 : U Myntri Rangbah ka jylla Conrad K Sangma ha ka sngi Palei ula plie ïaka GIS & UAV Centre kaba don ha Secretariat Shillong.
U Conrad Sangma ula ong ba ka jingdon jong kane ka Centre kan long ka jingmyntoi ïaka jylla da ka jingpyndonkam ïaki kor ki bor kiba thymmai, ki dur ki dar na Satellite, ki Drone bad kiwei kiwei na ka bynta ban ïoh ïa ki jingtip kiba bniah ha kiba bun ki liang khnang ba ka sorkar kan lah ban ai ïa ka jingshakri kaba kham bha bad ban peit bniah ïaka jingpyntreikam ïa ki skhim ha kylleng ki District jong ka jylla.
Ula ong kane ka tnad kan pyndonkam ïaki Drone ban peit ïaka jingdheng kali bad ki pulit ki lah ban peit ïa kine ki video ha kaba ïadei bad ka jingdheng kali bad wat ha ka por ba don ka jingbym shongsuk shong-saiñ, ka jingshlei um.
Ula ong ba ka jingpyn-donkam ïa ki Drone kan long kaba ai jingmyntoi bha ïaka sorkar jylla ha kaban shim ïa kino kino ki rai kiba kongsan.
