Shillong, Nohprah 28 : U Myntri ka tnad C&RD, Bah Hamlet Dohling ba dei ruh u MLA ka Mylliem ha ka sngi Thohdieng ba la dep u la plie ïa ka ïing skul ba thymmai jong ka Dr Homiwell Secondary School kaba don ha Mawklot.
Ïa kane ka ïing skul la tei na ka skim Chief Minister Special Development Fund (CMSDF – MLA Category) 2021-22 ha ka jinglut kaba 10 lakh tyngka.
Haba kren ha kane ka sngi u Bah Hamlet u la ong ba kadei ka thong jong ka sorkar ban iohi ba ki ïing skul kibadon ha ka jylla kin dei kiba paka bad kiba lah ruh ban ai ka jingshakri kaba janai ïa ki khynnah.
U la ai khublei ruh ïa ki nongpynïaid jong ka skul kiba la ïai trei shitom ban ai ïa ka jingnang jingstad ïa ki khynnah ka thain, watla ki hap ban pyndonkam da ka ïing skul kaba la rim.
Ha kane ka sngi la ïadon ryngkat lang u Bah Mawkordor Nongneng, Rangbah Shnong, Bah Banlum Tariang, Secretary Shnong, ki nongpynïaid jong ka skul, ki dkhot jong ka Dorbar Shnong Mawklot bad kiwei kiwei.
