Shillong, Nohprah :Kum shibynta ban ai mynsiem bad pynshlur ïa ki samla pule na ka liang jong ka Khasi Students’ Union (KSU) Diengpasoh Unit, Nonghali Unit bad Mynriang Unit ki la pynlong da ka jingsam khusnam ba la tip kum ka “1st Maitshphrang Letracy Award” ha ka jingïalang kaba la long ha ka 27 tarik mynta u bnai hapoh ka IB Diengpasoh.
Ka KSU Diengpasoh Unit Nonghali Unit bad Mynriang Unit ki dei kiba hap hapoh ka shnat treikam jong ka Mawryngkneng Circle.Ka jingpynlong jong ka Seng ïa kane ka jingpynkup burom na ka bynta kito ki khynnah pule ki ba wan sha khmat ha ki eksamin bapher bapher kata naduh SSLC HSSLC Degree bad kiwei kiwei ka long kum shi bynta ban pynshlur bad ai mynsiem ïa ki khynnah pule jong ka dong ka thaiñ ba kin ïa beh ha ka jingpule bad ba kin nang lah ban kiew sha ki kyrdan kiba shalor.
Ha kane ka sngi ka Seng ka la ïoh ban pynkup burom ïa ki 39 ngut ki khynnah pule kata kiba dei na ka thaiñ Mynriang ,Nonghali bad Diengpasoh. Ha kane ka prokram la ïa don lang ruh ki nongïalam jong ka KSU jong ki lai unit, kata Diengpasoh unit Nonghali unit Mynriang Unit nalor ki nongïalam KSU Mawryngkneng circle kiba kynthup ïa u Samla Dalum Kharpran Education Secretary, Samla Teibokskhem Shadap General Secretary nalor ki incharge napoh Eastern Central Division, nangta u Samla Kitbok Warbah Asstt Organiser KSU Mawlai Unit bad u Samla Readeon Nongrum Assist General Secretary KSU Sengkmie uba long ruh u Kongsan ha kane ka sngi.
Hashwa ka jingsam khusnam la ïoh ka jingkren na ki nongïalam ka KSU jong ki lai unit kumjuh ruh na u Kongsan u Samla Readeon Nongrum uba la kyntu kynpham ïa ki samla pule ba kim dei ban klet ïala ka jong ka ka Jaidbynriew haba ki la kiew ha ka jingnang jingstad, hynrei kum ki khynnah pule kiba la nang la stad ki dei ban buh shwa ïa ka jaitbynriew hakhmat.
Kiwei pat ki nongkren ha kane ka sngi ki la ai ïa ki kyntien kyntu kynpham ïa ki samla ba kin ïa beh sha ka jingstad namar khlem ka jingnang jingstad ka long kaba eh haduh katta katta khamtam ha kane ka juk kaba mynta.
Ha kajuh ka por ka Seng ka ai ka jingkitbok kitrwiang ruh ïa baroh kito ki khynnah pule ki ba la ïoh pdiang ïa kane ka khusnam ba kin nang treishitom shuh shuh ha ki jingpule ki jong ki khanng ba kin poi ha ki kyrdan ba shakhmat bad ba kin long ki khlur ba phyrnai jong ka ïing ka sem ka imlang sahlang bad ka ri bad ka jaidbynriew hi baroh kawei.
La pynshit pynshngaiñ shuh shuh ïa kane ka sngi da ka jingïadon ryngkat lang ki kmie ki kpa jong ki khynnah pule lem bad ki riew rangbah jong ka don ka thaiñ baroh kawei.Kane ka long katkum u kyrwoh lyngba u Samla J. J. Lyngkhoi, General Secretary KSU Mynriang Unit.
