Shillong, Nohprah : U MLA ka Mawlai u Bah PT Sawkmie ha ka 20 tarik mynta u bnai kum shi bynta ban ai mynsiem u la leit ban aijingïarap ïa uwei u nongai dawai kynbat ba pawnam ka jylla u Bah Reniwell Majaw uba don ia ka jaka ai dawai ba la tip kum ka Marba Majaw Herbal ha Mawlai Nongpdeng.
Ha kane ka juh ka sngi u MLA u la ai ruh ki jingïarap sha ki skul, ki shnong bad sha synjuk kaba ri ïa ki khunswet ka North East India Mission Association (NEIMA) ba la sam ha ophis treikam jong u ha Mawlai Nongpdeng.
Ki jingïarap kiba u la ai lyngba ki work order ki la kot sha ka 30 lak tyngka, kaba u MLA u la ai sha ka skul Christ Church, Mawlai Syllaikariah, Church of God, Mawlai Nongkwar, St. Francis, Mawlai Kyntonmassar, sha ka skul bad shnong Umpling Umjathang.Ha kajuh ka por u la ai ruh ïa ki song pisa sha ki nongïalehkai sports kiban leit ïakhun shabar jylla, kata sha Gujarat.
Haba ai jingkren u bah PT Sawkmie u la pynpaw ka jingsngewkmen ba ula lah ban pynurlong ïa ki jingkular kiba u la khlei sha ki bad u la ai ka burom baroh sha U Blei uba la long ryngkat bad u ban pynurlong ïa ki jingkular.
Ha kajuh ka por u la pynpaw ruh ba u dang don ïa ka jingangnud ban ai ka jingshakri kaba kham bha shuh shuh na ka bynta ka constituency hi baroh kawei bad u kyrmen skhem ba na ka liang ki paidbah kin dang ai ka jingshaniah kaba pura bad ba un ïoh biang ïa ka jingjop kaba don burom ha kane ka ilekshon ka ban wan.
Ha kane ka sngi la ïoh ruh ka jingkren na bah Alexander Syiem, President ka Christ Church Higher Secondary School, na u Bah P. Syngkli, chairman ka NEIMA, na ka kong Pauline Kurbah ba kren na ka bynta ka skul St. Francis, na u rangbah dong ka Umpling Umjathang bah K. Nongphud, na ka principal kong T. Jana jong ka skul Church of God bad na Bah Majaw, kiba la ai khublei bad pynpaw ka jingsngewnguh ïa u MLA ha kaba ïadei bad ki jingïarap kiba u la pynïoh na ka MLA skhim jong u. Nalor kata ki la ai ruh ka jingkitbok ba un dang ïoh biang ïa ka jingjop ha ka ilekshon 2023.
Nalor kata la ïoh ruh ka jingkren na bah Homer Kharkongor, president UDP Mawlai Circle, bah Franky Massar, bah Teibok Kharkongor bad kiwei kiwei.
