Jowai, Nohprah 28 : U Myntri jong ka sorkar jylla ba dei peit ïa ka tnad kam pynroi sor bad kiwei de u ma Sniawbhalang Dhar hynnin ka sngi 27 tarik u Nohprah ula wan ban plie pyrda ïa u mawnongrim ka ophis treikam ka ‘Seiñ Kynthai Dorbar Shnong Khliehtyrshi” kaba hap hapoh ka Thadlaskeiñ C&RD Block West Jaiñtia Hills District.
Ïa kane ka skim la pynïoh lyngba ka Chief Minister’s Special Rural Development Fund (CMRDF) ha ka jingmang pisa kaba T.10,57,206/- na ka bynta ka snem 2019-2020, ïa kaba la sdang ban pyntrei naduh ka 21 tarik June 2022 bad pyndep haduh ka 15 tarik November 2022.
Ha kane ka sngi plie ïa katei ka ophis treikam ka Seiñ Kynthai Dorbar Shnong la pynlong ïa ka jingïalang ha phyllaw ka Khliehtyrshi Dorbar Hall Cum Indoor Sports Stadium Mookyniang, ha ka jingdonlang u MLA ka thaiñ u ma Wailadmiki Shylla, u Waheh Shnong Ma Kitbok Rymbai, MDC ka Sohmynting Khliehtyrshi u Lakhon Dkhar, kiwei de ki riew rangbah bad ki paidbah nongshong shnong.
Ïa ka jingïalang la pynïaid da ka kong B. Sana bad la sam ruh ïa ka Work Order sha ka shnong Lumpyrdi bad ka Urtyrkhang Khliehtyrshi, U ma Sniawbhalang Dhar ha ka jingkren ula kular ban sdang pyntreikam ïa ka Memorandum ba la aiti mynta hi ka sngi da kaba pyntip hadien ba la kut jong kane ka snem ka jingkrep sawdong ïa ka jaka ka Khliehtyrshi Dorbar Hall Cum Indoor Sports bad ban pynbha ïa ka madan ha kaba yn mang pisa haduh 30 lak bad ïa kane yn pyndep hashaw ban poi ka Election.
Ha ka juh ka por u kyntu ïa ki nongshong shnong ka Khliehtyrshi ba kin don ka jingïatylli kawei kumba long naduh ki por mynshwa, da kaba ula pan biang ka jingkyrshan ba pura ïa u MLA ma mynta u ma Wailadmiki Shylla ba um wan biang ha ka jingjop, khnang ba un dang lah ban trei khambha bad ban wanrah shuh shuh ïa ki skim bapher baper ha kine ki snem ban wan.
Shuh shuh ula ai ka jingïaroh ïa u MLA ka thaiñ uba la trei shitom ha kine ki snem ba la dep wat hapdeng jong ka jingeh na ka khlam Covid-19 hynrei ula lah ban wnarah ïa ki kam pynroi ha kiba bun ki liang na ka bynta ka Constituency hi baroh kawei.
Ula kop ba katkam ka jingïoh lum jingtip ha kane ka Election 2023 ka NPP kan sa wan ha ka bor shynshar tang mawei (single Majority) bad ka jingshakri sha ki paidbah kan long arshah ban ïa kane ka san snem ba bala jan kut. Ula kop ruh na ka 1-Nartiang Constituency un sa jop suk da kaba tam bun eh ka Vote ha ka 2023.
U ma Wailadmiki Shylla ha ka jingkren ula pynsngew shaphang ki kam pynroi kiba la wanrah hapoh kane ka shnong Khliehtyrshi naduh ka umbam umdih, ki lynti syngkieñ, ki skul bad ki jingïarap sha ki kynhun Balang bapher bapher. La pynphuh shuh shuh ïa kane ka sngi da ki jingshad tynrai na ki khun samla bad ki hep rit ka shnong.
