Nongpoh, Nohprah 29 : Ka dei ha ka sien kaba nyngkong eh ba ka Ri Bhoi District ka ioh plie ïa ka dukan ban die ïa ki jaid tiar siat ba bun jaid ha ka sngi Nyngkong jong ka Taiew, kaba dei hadien ba ka sorkar ka la ai bor ban plie ïa katei ka dukan kaba don ha Borbhuin, Byrnihat bad ba la tip ruh kum ka M/S East India Arms ha kaba la long trai da u Bah Dilip Kharkhrang, uba dei na katei ka shnoing. Ïa kane ka dukan die ïa ki tiar siat ba bun jaid la wan ba plie paidbah da u MLA ka Jirang Constituency, u Bah Sosthenes Sohtun ha ryngkat ka jingdon lang u MDC, u Bah Victor Rani, u Bah Dilip Kharkrang, uba dei u trai ka dukan bad kynthup kiwei ki riew rangbah na ka thaiñ Byrnihat.
Kumba la pynpaw ha katei ka sngi, kito kiba lah ban thied ïa kitei ki tiar siat ki dei tang kito kiba la ithuh da ka sorkar bad kiba la ai bor ruh da ka sorkar ban pyndonkam ïa ki tiar katkum ka jingai jingbit ka sorkar. Kumba la ïa thuh da u Bah Dilip Kharkrang, u la ong ba katei ka dukan die tiar siat, ka dei kaba nyngkong eh ha Ri Bhoi bad bynrap ruh ba ïa kitei ki tiar siat ne ki kuli bad bakhor na katei ka dukan, ym ban shu die pathar sha ki paidbah bad yn die tang ïa kito kiba don lisen bad ba ioh jingbit na ka sorkar.
Shuh shuh, u la ïathuh ruh ba ki tiar siat kiba lah ban ioh na katei ka dukan, ki kynthup naduh ki suloi shi ktang, ar ktang, ki pistol bad ki kuli bad ruh ym shem la buh na ka bynta ban die sha ki briew ka sorkar ne ki pulit bad kan dei beit tang ïa kito ki nongshong shnoing ka Ri Bhoi kiba don Lisen bad kiba la ioh jingbit na ka sorkar bad ki briew kiba na shabar ka District kin nym lah ban thied ïa kitei ki tiar siat, u la bynrap.
