Nongpoh, Nohprah 29 : Ka kynhun Ri-Bhoi Artist kaba dei ka kynhun jong ki tyngshop ki puron, ki nongpynmih phlim bad jingrwai mynta ka sngi kila sdang ïaka tamasa Ri-Bhoi Cultural and Food Festival ba 2 sngi lynter bala pynlong ha madan NSCA Pahamsyiem.
Ïa katei ka tamasa la wan ban plie pyrda da u Paiem Wanphrang Syiem Sirdar ka Elaka Nongpoh Sirdarship kum u kongsan, haka jingdonlang u Dr. Ricky Syngkon Professor ka skulbah NEHU, Bah Lansius Syiemlieh President ka Ri-Bhoi Artist, u Bah Jamberson Marak bad kiwei kiwei ki riew rangbah, ryngkat ki nongïashim bynta bapher bapher ha katei ka tamasa.
Kum ban shu pynpaw baka thong jong katei ka tamasa ka long ban sei bad pynpaw pyrthei ïaka sap ka phong jong ki khun samla haki sap bapher bapher ba ki don kum ka rwai ka siaw, ka shad ka tem, ban long ki thei dait riam ki kam ak phlim, bad kiwei kiwei kumba ka Ri-bhoi District kam duna shuh haki pynmih ïaki jait jingrwai, ki phlim bad kumta ter ter watla kam don kano kano ka jaka pule ba kyrpang ban pyntbit ha kitei ki bynta.
Haba kren ha katei ka sngi naka liang u Paiem Wanphrang Syiem u la pynpaw ka jingsngewkmen bad ai ka jingïaroh ïaka kynhun Ri-Bhoi Artist kaba la shim ïa katei ka sienjam ban pynlong kum katei ka jait prokram naka bynta ban sei ïaka sap ka phong ki khun samla naka dong Ri-Bhoi khamtam ban long kum ka rynsan ban pynpaw pyrthei ïaka sap kaba ki don.
U la kyntu ruh ïaki khun samla ba kidei ban pyndonkam hok ïaka sap kaba ki don naka bynta ka jingmyntoi ha kum kane ka juk kyrduh kam kyrduh jam ban long ruh kum ka jingplie lad ïaki ban ieng hala ki jong ki kjat.
