Yn siat beit ki BSF bad BGB ïa kiba kam sha shilliang pud ka India bad Bangladesh, ong ka KSU

Shillong, Nailar 18: Ka KSU jong ka EJHDU ha ka 17 tarik u Nailar 2024 ka la leit ban jurip ïa ki border fencing ba don ha shnong Lailong bad ruh ban ai mynsiem ïa saw tylli ki dorbar shnong khappud kiba kynthup ïa ka lejri, Lahalein, Huroi bad Hingaria bad ka la kam ruh ba ki shipai BSF bad ki shipai ka BGB kin siat beit ïa kino kino ki briew kiba kam sha shilliang khappud ka ri India bad Bangladesh.
Ka jingleit ai mynsiem bad jurip ka long halor ka nongrim ban pyrkhing ïa ka jingwan rung beaiñ ki mynder na Bangladesh ha kaba kane ka ri ka don ka jingïaumsnam ba shyrkhei.
Ha kane ka sngi ka seng ka la ïoh ban pynlong ka jingïalang ha ka shnong Huroi ha kaba la wan shim bynta da baroh ki saw tylli ki shnong kiba mihkhmat da ki waheh shnong bad secretary shnong bad ki lai tylli ki shnat treikam ka seng naduh ka KSU Lejri Unit, KSU Huroi Unit bad ka KSU Hingaria Unit.
Ha kane ka jingïalang ka seng ryngkat ki unit bad ki Dorbar shnong ki lah ïoh ban ïathir bad mir jingmut ba kumno ban pyrkhing shuh shuh ïa ka jingwan rung ki mynder na Bangladesh sha ka ri.
Ha ka jingïakren bad ki dorbar shnong bad ki unit la sngewthuh ba haduh mynta ka jinglong jingman ha ki thaiñ khappud kiba kine ki dorbar shnong ki don, ka dang biang hynrei ka shu don tang ka jingjynjar ha ka kam khaïi pateng.
Ka seng ka la ïoh ruh ka jingpynsngew na ka KSU Hingaria Unit ba ha ka thaiñ bad shnong Hingaria ki BSF kim shym la shong ha border hynrei shapdeng surok kaba jngai kumba 3 ne 4 kilometre bad la pynpaw ruh ka jingeh ba na kine ki thaiñ ki shait kham ïoh rung bha ki khar Bangla ha ki por ba la leit.
Na katei ka jaka ki la ju don ruh ki riew bad kynhun kiba long dalal ban pynrung ïa ki khar Bangla da ka ïakren sngewthuh lyngba ki sbai rupa. Ka seng shen kan sa hiar khnang sha kane ka thaiñ ban ïa syllok kyrpang bad kine ki shnong khnang ban lah ban pyrkhing ïa ka jingrung ki mynder.
Ka seng ha kane ka sngi ka la leit ban jngoh ruh ïa ki BOP Huroi bad Lailong bad ruh la ïoh ban ïamir jingmut bad ki heh ka BSF ba don ha kitei ki BOP shwa ban jurip sha ki jaka ba la ker sainar shiah ha khappud.
Ha ka jingïakren bad u SI jong katei ka BOP u la ïathuh ruh ba haduh mynta ym pat don ka jingrung hynrei kin ïai peit pyrman bha, u la ïathuh ruh ba shait don hi kita ki dalal kiba leh ïa kine ki kam pynrung briew na Bangla bad ïa kine lada lap yn leh tyngeh katkum ka aiñ.
Ka seng kan sa hiar rung sha ki katto katne tylli ki shnong khappud bad ka Bangladesh ha ki sngi ki ban wan kiba kynthup ïa ka Kuliang, Donaskur, Dona Umbluh Ampyrdit ha kaba kine ki long ki jaka kiba shait laitlan (Vulnerable) bha ki khar Bangla ban rung lyngba ki Dalal.
Ka seng kan ïai peit pyrman bad ruh kan ïai ai ka kti kamon kti ka diang ïa ki dorbar shnong ki thaiñ khappud, ka seng ka buh ruh ka jingmaham ïa ki paradoh parasnam jong kito ki shnong khappud ba kim bit satia ban rung shabar ka jingker ha khappud namar ba katkum ka jingïathuh ki BSF ba ki Bangladesh Border Guard (BGB) ki la ïoh jingbit ban siat beit kat kiba tam ïa u pud.
Na ka liang ki Border Security Force (BSF) jong ka Ri India ruh ki la ïoh jingbit ban siat beit ïa ki khar Bangla lada ki tam shapoh u pud jong ka Ri. Kumta la kyntu ba ki paradoh para snam kiba don ha ki khappud ba kin husiar bad ban nym tam pud ïoh don ka jingjia ba sngewsih. Kane ka long ka kyrwoh khubor na u Publicity Secretary ka KSU EJHDU Hamewanpynhun Ryngkhlem.