Nongstoiñ, Nailar 18: Ka Mawphanlur ka dei ka jaka kaba ngai tang kumba san kilomitar tam na ka shnong Markasa kaba don harud ka surok bah National Highway 44 (E) Shillong-Tura, ka dei ruh ka jaka jngohkai kaba la khring ïa ki nongshangkai suwari na kylleng ki jylla jong ka ri India bad wat ïa kiba nabar ka ri India ruh.
Watla katei ka jaka ka dei kaba paw nam haduh katta katta ha ka jingitynnad bad kaba la don ruh ïa ki jaka sah kiba biang na ka bynta ki nongshangkai suwari kiba wan ban sah miet, hynrei katba nang mih ki sngi ka jingjot jingpra jong ka surok ka nang jur.
Ha kaba ïadei bad ka jingjot rathai jong ka surok naduh shnong Markasa haduh Maphanlur ki paitbah nongleit kai na kylleng, ki la ther jur bad ong ba lada ka long kumne khlem don ba maramot shuh, ym slem ka jingitynnad bad ka nam jong ka Mawphanlur kan sa duh noh.
Kumjuh ruh na ka liang ki nongshong shnong jong ka Mawphanlur ryngkat ki nongpynïaid ïa katei ka jaka jngohkai haba ïakren bad u nongthoh khubor, ki la pynpaw ïa ka jingsngew bynñiaw, nalor ba kane ka jingjot ka long kaba la kham slem hynrei ym don ba peit shuh ban pynbha ne maramot noh. Ki la ong ruh ba ka jingjot jong katei ka surok ka buh jingeh ruh ha ka leit ka wan ka kit ka bah ïa ki nongshong shnong katei ka thaiñ.
U bah Bony Lyngdoh Lyngkhoi u nongpynïaid jong katei ka jaka jngoh kai, u la ong ba ha ka jingshisha ka sorkar lyngba ka Tourism Department, ka la leh bha haduh katta katta ha kaba ka la ai jingïarap haduh lai kur tyngka na ka bynta ban pynbha shuh shuh ïa ki jaka sah jong ki nongwan shangkai suwari. Nangta ban pynitynnad shuh shuh ïa ki sawdong sawkun jong katei ka jaka bad ka jingpyntrei ïa kitei ki jaka sah ba thymmai ka la ïaid shait shait. Hynrei ka surok pat kam long shuh namar ka la nang sniew kan nang mih ki sngi ki por.
U la ïathuh ba ka jingwan jong ki nong jngoh kai kat nang mih ki snem, ka la kiew bha. Kane ka jingkiew ki nongleit shangkai khamtam eh kiba na shabar ka Jylla, ka la long ka jingmyntoi kaba khraw ïa ki nongshong shnong khamtam ïa ki samla napoh ka shnong Mawphanlur.
Utei u nongpynïad jong katei ka jaka jngohkai u la ong ruh ba ka la I donkam bha ban kham pynheh bad kham pynbha shuh shuh ïa katei ka surok naduh shnong Markasa, namar kumba ka long mynta ka jingheh jong katei ka surok kam pat biang satia.
Nalor kata u la ong ba kumba ka sorkar ka kwah ban kyntiew ïa ki kam jngohkai ha ka jylla bad ban pynlong kum kawei na ki lad ai kam ai jam ïa ki samla, na ka bynta ban pynkhlaiñ shuh shuh ïa ka ïoh ka kot jong ki nongshong shnong, ka tnad PWD ka la dei ban don ka jingïatreilang kaba jan bha bad ka tnad jngohkai pyrthei, ha ka ban leit jurip lang ïa ki surok kiba pynpoi haduh ki jaka jngohkai, khnang ba ki nong wan shangkai suwari kin sngew tynnad haba ki wan.
Ha kajuh ka por u la ong ba na ka bynta katei ka surok, ma u kum u nongpynïaid ryngkat ki para dkhot kiba ïadon bynta lang ha katei ka jaka jngoh kai ,kin sa leit ban ïakynduh ïa ki myntri sorkar kiba dei peit ïa ki surok na ka bynta, ban kyrpad ba kin shimkhia ha kaban pynbha bad pynheh shuh shuh ïa katei ka surok naduh Markasa haduh Mawphanlur.
