Shillong, Nailar 18: Ka North Eastern Hill University Teachers’ Association (NEHUTA) ka la dawa badei ban wengkam noh mardor ïa u vice chancellor jong ka university u Prof PS Shukhla halor ki kam pyrshah riewlum bad ruh ba thung ïa u Registrar da u shipai ba la shongthait.
Ha ka shithi sha u Member, National Commission for Scheduled Tribes Nirupam Chakma, u President ka NEHUTA u Prof Lakhon Kma u la ong, “Ngi la rai ban thoh shaphi kum u dkhot ba kitkhlieh jong ka National Commission for Scheduled tribes (NCST) ban pyntip ba dei ban maham ïa u VC ba u la pyndonkam bad leh ki kam pyrshah riewlum bad dei ban wengnoh ïa u na ka office mardor.”
“U VC u la pynkheiñ ruh ïa ka Hok ka Jingïaryngkat ne Right to Equality kaba la ai hapoh ka Article 14, 15 bad 16 ka riti synshar ka ri ha kine ki 3 snem ba la leit. U la dei ruh u nongpynkheiï ia kiba bun ki rukom treikam ka university bad NEHU Act, ki Statute, ki Ordinance bad ki Regulation bad ka UGC Regulation 2018 naduh ba u la don ha NEHU kum u Vice chancellor ha u snem 2021,” u la bynrap.
Haba ong ba ka jingpaw jong ka University ka la hiar stet ha ka kyrdan pule ha ka jylla, u la ong, “Hadien ba u Prof Shukla u la shimti kum u VC NEHU ha u Naitung 2021, ka kyrdan ka NEHU katkum ka National Institutional Ranking Framework (NIRF) Ministry of Education, Government of India, ka la poi sha ka 59; ka la hiar sha ka 66 ha u 2022; 80 ha u snem 2023 bad kaba sniew bha kadei ba na ka 56 ka position kata sha ka 136 ha u snem 2024.
U la kynnoh ruh ba nalor ba ka Meghalaya ka la hiar bad kum ka jylla kaba duk tam ha NE u VC u la nang pynhiar shuh shuh ïa ka kyrdan jong ka jingduk da kaba u la kyntait ban ai kam ïa ki riewlum ka jylla.
U la ong ba naduh ba la shimti u VC NEHU, u P.S. Shukla u khlem lah ban wanrah ki project thymmai ne ki scheme ban kyntiew ïa ka kynhun ki riewlum jong ka NEHU bad ka jylla baroh kawei.
U la kynnoh ba u Vice-Chancellor ka NEHU Prof. P. S. Shukla u la ban beiñ ïa ki jaitbynriew riewlum bad ïa ka thaiñ da kaba u khlem lah ban thung ki kam kiba lait hapoh ki kyrdan non-teaching position kum ka kam Deputy Registrar, Registrar, bad Finance Officer.
“Kaba nyngkong baroh kadei ka jingthung kam da u shipai ba la shongthait u Colonel-Shri Omkar Singh ha ka kam Controller of Examinations da kaba ïehnoh ïa kiba la tbit kiba dei hi na Meghalaya kaba long kum ka kam kaba ïashah liang ïa u,” la kynnoh u Prof. Kma.
U la kynnoh ruh ba hadien ba la weng ïa u Omkar Singh na ka post Controller only hynrei u la tyrwa pat da kawei ka kam Registrar bad dei halor kane ba la mih ka jingkulmar ha ka kam thoh CUET Undergraduate examination ha NEHU ha ka 15 tarik u Jymmang, 2024 uba la thung ïalade kum u Supervisor na ka bynta ka CUET centre ha NEHU, Shillong.
