Yn shongshit tam ka jingïakhun hapdeng ki lahduh 2019 ha ka SF mynta u snem

Da 2-0 kol pynliem ka Lajong ïa ka Riangdo

0

Shillong, Jylliew 06 : Ka Shillong Lajong ka la ïoh ban khur ïa ka jingïakhun ba khatduh ha ka Group jong ka Meghalaya State League da kaba pynliem noh ïa ka Riangdo da 2-0 kop ha ka jingïakhun kaba long ha madan MDSA, Mawkyrwat.
Ha katei ka lympung tad haduh katei ka sngi la sakhi ba la thep haduh 300 tylli ki kol ha ki saw tylli ki lympung ïalehkai jong ka jylla kaba la wan ban shim bynta da ki klob na ki synjuk ba la ithuh na jan baroh ki distrik jong ka jylla kaba la sdang naduh ka 12tarik Jymmang.
Ïa kitei ki ar tylli ki kol jong ka Shillong Lajong la ïoh ban thep da u Shano Tariang ha ka minit kaba 55 jong ka kylla miet katba ïa ka kol kaba ar pat la ïoh ban thep da u Sangti Janai Shianglong ha ka minit kaba 69 jong ka kylla miet. Da katei ka jingjop, ka Shillong Lajong ka la pyntikna lypa ïalade na ka Group C ban jam shakhmat sha ka semi final.
Mynta baroh ki khmat ki phai pat sha ka jingïakhun ha ka semi final kaban kynthup ïa ki lai tylli ki klob nalor ka Shillong Lajong, kata ka Mawlai na ka Group A, ka Rangdajied United na ka Group B bad ka Khliehmawlieh naka Group D.
Ïa ka jingïapynïakap na bynta ka semi final la pynlong ha Shillong hynin ka sngi ha kaba saw ngut ki nongshah khot kyrpang ba kynthup ïa ki nongïalehkai ba kynsai, kata u Redeem Tlang, Aiban Dohling bad u Halen Nongtdu kumjuh ruh ka Assistant Referee jong ka FIFA, ka Ri-ïohlang Dhar nalor u Tournament Director Bah Wanshanbor Kharkrang kumjuh ruh ki nongmihkhmat na kitei ki saw kynhun.
Katkum katei ka jingpynïakap, ka Khliehmawlieh kan hap ban aireng pyrshah ïa ka Mawlai katba ka Rangdajied pat kan hap ban aireng pyrshah ïa ka Lajong.
Ïa ka semi final yn pynïakhun ha ka rukom jong ka ‘home’ bad ‘away’ kaban sdang naduh ka 10tarik u Jylliew katba ka jingïakhun ha ka kylla kaba ar pat kan long ha ka 13tarik Jylliew. Ïa ka final pat la pynbeit ban pynlong ha ka SSA Stadium madan First Ground, Polo Shillong ha ka 17tarik Jylliew. La pynbna ruh ba na bynta ki jingtip kiba kham bniah kiba ïadei bad ka jaka bad ka por ban sdang yn sa pyntip ha ki khyndiat por.
Lah ban kdew hangne ba ka Khliehmawlieh ka la rung teng ha ka MSL ha u 2019 hynrei kam shym lah satia ban poi sha ka knockout katba ka Mawlai pat kadei ka kynhun kaba dang shu rung thymmai sha ka MSL mynta u snem hi.
Ka Lajong bad Rangdajied ki la kynduh teng ha ka final ha MSL 2019 ha Khliehriat kaba ka jingïakhun ka la poi haduh ka jingïashut tie breaker ha kaba ka Lajong ka la ïoh ban khur ïa ka nam lahduh da 3-0 kol.
Katba kane ka semi final mynta u snem pat kan long biang kum ka jingïakhun phaidien ïa ka jingïaknieh ïa ka jingjop kumba la jia ha ki saw snem mynshwa. Hynrei mynta ka kynti ym lah satia ban ong kano ka kynhun kaban jop namar baroh ar tylli ki la pyni ïa ka jingtbit jong ki.

Leave A Reply

Your email address will not be published.