Shillong, K’lyngkot 31 : Ka sorkar jylla ka la rai ban bishar bniah biang sa shisien ïa ka Meghalaya Residents, Safety and Security (Amendment) Bill ban pyntikna ba kan lah ban ïaid ryngkat ryngkat bad ki aiñ jong ka sorkar pdeng haba ïadei bad ka jingïakhun ban teh ïa ka jingrung kyrthlep ki mynder sha ka jylla.
Haba kren bad ki lad pathai khubor ha kane ka sngi Balang, U Myntri Rangbah u la ong, “Ngim pat ïoh ban peit bniah ïa ka tangba ngi la dep ban ïakren halor jong ka. Ngi hap ban don ka jingïasyllok bad ki kynhun bapher bapher ïa kaba ngim pat pynbeit ïa ka tarik.”
Shuh shuh u ong ruh ba kaba hakhmat ka long ban bishar bnïah biang ïa baroh kawei bad ban wad ïa ka lynti kaba paka tam kaban lah ban sei ïa ki kyndon kiba biang khnang ba kin ym ïa tyngkhuh pat bad ki aiñ ka sorkar pdeng bad ruh bad ki kyndon jong ka Riti Synshar jong ka Ri.
Lah ban kdew hangne ba ha u snem ba la dep ka Ministry of Home Affairs ka la pynphai biang ïa ka MRSSA-B 2020 bad kdew ruh ba ka jingbuh ïa ki facilitation centre lane ki check gate hapoh katei ka Bill kan ktah ïa ka ïaid ka ieng jong ki paidbah lyngba ka Meghalaya kaba dei ka surok bah kaba ïaid lyngba ban leit sha kiwei pat ki jylla.
