Ba shah kheiñ khynnah surok, byrngem khang tala ka HYC ïa ka NEIGRIHMS Hospital

Shillong, K’lyngkot, 31: Ki nongïalam jong ka Hynñiewtrep Youths Council (HYC) kiba la leit ïakren bad u Director ka NEIGRIHMS Hospital, u Dr. Nalin Mehta ki la mih jyndat na ka jingïalang hadien ba ki la kynnoh ba une u khlieh nongpeit jong ka NEIGRIHMS Hopsital u la kren ibein bad khein ïa ki kum ki khynnah surok kiba kwah ban thaw jingkulmar.
Katkum ka jingïathuh jong u President ka HYC u Bah Roy Kupar Synrem ka seng ka la leit ïakynduh ïa u Dr. Mehta ka long hadien ba u la phah ktien sha ka seng ban ïakynduh mynta ka sngi Balang ban ïakren halor ka jingdawa hadien ba ka seng ka la ai por hapoh 10 sngi ban pynurlong ïa ki jingdawa.
Ha ka 22 tarik mynta u bnai, ka Seng ka la phah da ka jingthoh sha u Director ka NEIGRIHMS halor ka jingdawa ban pyndam noh mardor ïa ka jingthungkam Nursing Officer lyngba ka NORCET kaba ktah ïa ki samla thepkam trai jylla bad ba ïa ka jingthungkam dei ban pynlong beit da ka NEIGRHIMS.
Ka Seng ka la dawa ruh ba ïa ki jingthungkam hapoh ka NEIGRHIMS ym dei satia ban aiti sha ki Agency kiba nabar bad ban pynlong ïa ka eksamin thungkam hapoh ka Jylla ym shabar ka jylla. Nalor kata, ka seng ka la dawa ba dei ban aiti ban pynïaid ïa ki kam sha ki Outsourcing Agency kiba la tbit na ka jylla ym da kiba nabar jong ka jylla. Ba ïa ki kam Contractual ne Contract dei ban ai sha ki trai jylla kiba la biang ïa ka kyrdan pule. Ban pyntreikam ïa ka one-time absorbtion policy na ka bynta ki Nurse kiba la shah thungkam Contractual Basis. Ba ïa ki kam Group-C bad Group-D dei ban mang 80% sha ki trai jylla.
Ka Seng ka la aipor 10 sngi ïa u Director ban pynurlong ïa kine ki mat jingdawa bad byrngem ruh ban khang tala ïa ka Ophis treikam jong ka NEIGRIHMS.
Ki Magistrate bad ki Pulit kiba la ïoh jingtip halor kane ka jingjia, ki la wan poi ban tohkit ïa ka jingbyrngem jong ka Seng ban khang tala ïa ka NEIGRIHMS. Ha ka jingïakren, u President ka HYC u la ïathuh ha u Magistrate da kaba kynnoh ba ka jingbitar ki nongïalam ka seng ka long ba u Director ka NEIGRIHMS Hospital u la ibein bad kynnoh ruh ba ki dei kiba kwah ban thaw jingkulmar.
Hadien ar kynta ba ki san ngut ki nongïalam ka seng ki la ieng ha phyllaw, u Dr. Mehta u la wan mih hi dalade ban pynjem ïa ki nongïalam ka HYC bad panmap ruh ïa kaei kaba u la kren hapoh ka jingïalang.
Hadien ka jingïakren sngewthuh jingmut, u Director u la kyntu ïa ki ban pynlong biang ïa ka jingïakren bad ka seng, hynrei ki nongïalam ka HYC ki la pynpaw beit markhmat ba kim kwah shuh ban dang ïakren bad u mynta ka sngi hynrei ban phah ktien ha kawei pat ka por ban ïakren halor ki jingdawa jong ka seng.