Shillong, K’Lyngkot 31 : U Myntri Rangbah ka Jylla, Conrad K Sangma ha kane ka sngi Balang u la pynpaw ba ka jingweng ne ka jingmab ïa ki kam bymman ba ka HNLC ka leh kan long katkum ka jingpynngat kyndon kata na kawei sha kawei pat.
Haba kren bad ki lad pathai khubor, u Myntri Rangbah u la ong ruh ba ïa ki kyndon ba la buh (term and conditions) ym lah satia ban pynkylla namar ki dei baroh kajuh na bynta baroh ki kynhun pyntriem.
Dei ha ka 03tarik u Kyllalyngkot mynta u snem ka HNLC ka la weng noh ïalade na ka jingïakren ïasuk da kaba ong ba ka Sorkar kam shym la mynjur ban pyntreikam ïa ki 5 tylli ki mat jingdawa ba hakhmat jong ka seng kiba kynthup ïa ka jingweng noh ïa baroh ki jingpynngat kyndon pyrshah ïa ki Nongïalam bad ki dkhot jong ka seng.
“Haba ïadei bad ka jingweng noh ïa ka jingpynngat kyndon la dep ban ïa kren katkum ka jingshah pynngat kyndon da kaba bishar ïa kawei pa kawei bad yn hap ban khmih la ka jong ka jong,” u la bynrap bïang.
Nalorkata, haba bynrap biang halor ki kyndon ïa kren ïasuk, u Myntri Rangbah u la ong ba ki don da ki kyndon ba ju buh ha man la ki jingïakren bad kumta lada ka sorkar ka pynkylla ïa kine ki kyndon na bynta ki katto katne ki kynhun kan buh jingeh pat wanrah ïa ka jingïakren ba long kumjuh ïa kiwei pat ki kynhun. Katkum ka jingong jong u, ki kyndon ba la buh na bynta ka jingïakren ïasuk ka dei ka bym lah ban pynkylla.
Ha kajuh ka por u la kyntu ruh ïa ka HNCL ba kan pyrkhat biang sa shisien ïa ka rai bad ban bteng biang ïa ka jingïakren ïa suk.
