Yn shimkhia u MLA North Shillong ba ka sorkar ka dei ban pynduhnoh ïa ka soskular ha Lumpongdeng

Shillong, Ïaïong 14: Katba nangmih ki sngi la ïohi ba la sdang ban bun ki riewpaw khmat ba kynthup naduh ki nongmihkhmat paidbah haduh ki sengbhalang bad kiwei kiwei ki riew saiñ pyrthei ban leit ai jingkyrshan ïa ka jingïakhih jong ki dkhot ka Green Tech Foundation ban shah thngan hapoh madan Malki naduh ka 9 tarik mynta u bnai.
Nalor ki nongïalam jong ka seng Voice of the People Party ba kynthup ïa u President u Bah Ardent Miller Basaiawmoit, u kyrtong MP u Dr. Batskhem Myrboh, ki MDC na Khasi Hills bad Jaiñtia Hills, ha ka janmiet pat jong ka sngi baar sa u U MLA jong ka 17 North-Shillong u Bah Adelbert Nongrum u la leit ban jngoh ïa u Chairman jong ka Green Tech Foundation u Bah H.B. Nonglang u ba la pynlong ïa ka jingïakhih shah thngan jong u ban pyrshah ïa ka soskular kaba sorkar ka ïasoi bad ka Taj Company ban aiwai ïa ka jaka kaba 66 akar kynthup ïa ka Dewlynnong u Lumpongdeng ban shna hotel.
Kane ka jingleit jngoh jong u MLA ka North-Shillong ka long ban ai jingkyrshan ïa kane ka jingïakhih jong kine ki bad na ka liang jong u, u la ong ba kum u nongmihkhmat um sngewlah ban shu shong khlem da wan ai mynsiem ïa ki.
Haba kren ha lad pathai khubor ha kane ka jingleit jngoh ïa u Bah Nonglang u la ong ba na ka liang jong u ruh un ïaid la ka jong ka lynti namar ïa u la jied da ki paidbah bad ban pynthikna bad ban shimkhia na ka liang jong u ba ka sorkar kan pynduh noh ïa kane ka soskular namar ka ktah ïa ka pateng kaba mynta bad ïa ka pateng ka ban sa wan.
U la ong ba kine ki khun samla kim dei ban sngew ba ki shah ieh bad ha kajuh ka por u kyntu ïa ka jaitbynriew baroh ba kin duwai lem na ka bynta jong ki bad u la pynkynmaw ba u la wanrah ïa kane ka mat kaba ïadei bad u Lumpongdeng hapoh ka Ïing dorbar thaw aiñ kaba dangshen.
Haba phai sha ka aiñ khyndew ne ka Land Transfer Act, u Bah Nongrum u la ong ba kane ka jingai wai haduh 66 acre sha ka Taj Company kaba ka sorkar ka la ai kumba la ïoh ha ka RTI, ka long kaba ym lah ban pdiang bad ka ïapher na kane ka aiñ.
“Lada shi acre ka jaka ka la ïasynriem ka jingheh kat ka madan lehkai phutbol kaba heh, te lada 66 acre ka la long haduh kumba 66 tylli ki madan lehkai, kumta kam lah ban long ban ïaid shakhmat ïa kane ka jingthmu,” ong u Bah Nongrum.