Ujor ejahar u MDC ka BJP kynnoh ba pynjulor ïa u Maw Mot dur U Jisu bad wiang ding ha Chibinang

Shillong, Iaiong 14 : U MDC ka BJP na Tura u Bernard N Marak, ula ujor daka ejahar hahkhmat u Superintendent of Police ka West Garo Hills, bad dawa ban leh tyngeh kat kum ka aiñ halor ki jingkulmar, jingwiang ding bad pynjulor ïa u Maw Mot dur U Jisu Khrist ha ïew Chibinang myn ha ka 9 tarik Lber.
Ha ka shithi ba 14 tarik Iaiong, u Marak uba dei ruh u Vice President ka BJP ha Jylla, ula ïathuh ba la pyntip sha u halor kine ki jingjia ha ka jingleit jngoh jong u sha Chibinang bad ki shnong ba marjan kiba shah ktah ha ka jingkulmar ba dang shen.
“Ki paidbhur, kham bun ki dei ki mynder ba rung beaiñ, kila ïalum beaiñ bad pynmih ïa ki jingkulmar ha ka thaiñ Chibinang myn ha ka 9 tarik Lber 2026, kaba la kynnoh pynshit bad ai ding da u MLA barim bad MDC Estamur Mominin” ong ka jingujor.
Kat kum ka jingong jong u, ki paidbhur ki la wiang ding ïa katto katne ki dukan bad ki ïing briew, kaba la pynjulor bun ïa ki nongkynti bad ki lad kamai jakpoh. “Ki paidbhur ki la pynjulor khnang ïa u Maw Mot Dur jong u Jisu Khrist ha ïew Chibinang, kaba la pynmong jur ïa ka jingsngew jong ki paid Khristan” ula ong.
U Bernrad ula kynnoh ba ym pat don ejahar ba la register haduh mynta bad kane ka kam ka paw kum ka jingleh bym ïohi wat hapdeng ka jingktah jur ïa ka jingshong suk shongsaiñ hapdeng ki Jaidbynriew bapher bapher bad ka jinglong jingman ha ka thaiñ”.
Ka jingujor ka pynpaw ruh ïa bun ki jingkynnoh kiba hap hapoh ka Indian Penal Code ba kynthup ïa ka kyndon 295, 295A, 153A, 436, 505, 120B , 141 haduh 149 .
Ula kyntu ïa ki Pulit ba kin register mardor ïa ka jingujor kum ka ejahar bad ban pynlong ïa ka jingtohkit ka bym shah liang bad ba bniah bad ban pyndep ruh hapoh ka por kaba biang.
U MDC ula dawa ruh ban ithuh bad kem ïa baroh ki briew kiba donkti kynthup kito kiba kynnoh kynshoit ïa ki jingkulmar nalor ban ai jingïada ïa ki nongshong shnong kiba shah ktah, ki nongsakhi bad ki riewngeit Khristan.
Katba na ka liang u Symbud Myntri Rangbah uba dei peit ia ka tnad kam pohiing u bah Prestone Tynsong u la ïathuh ba ka jingtohkit ka la ïaid shakhmat halor ka jingpynjulor ïa u maw mot dur jong u Jisu Khrist ha Chibinang, West Garo Hills.
“Ngi la dep thung ïa ka inquiry committee halor kane” ong u Bah Prestone haba kylli halor kane ka jingjia kaba la jia ha ka 9 tarik Lber namar ka jingkulmar na ka jingïïakynad pher Jaidbynriew.
ïa mynta, u MLA barim Esmatur Mominin ula pyndem ïalade hakhmat ki Pulit ka Ri-Bhoi hadien ka ejahar ba la mudui pyrshah ïa u ba kynnoh donkti ban kynshoit ïa ka jingkulmar kaba jia ha ri-lum Garo.
Haba kylli halor ka jingpyndem u Mominin, u Bah Prestone ula ong “Ngam kwah ban ong eiei halor kane ïa mynta. Ai ba ka jingtohkit kan ïaid namar kam ïahap ïa nga ban ong eiei. Kumta, kan bha ban ngin ap. Ka por kan sa poi ha kaba phin sa tip hangno ba ngi la poi”.