Yn shah ktah kylla ki samla pule lada kylla dien biang ïa ka National Education Policy : UDP

Shillong, Nailur 18 : U General Secretary ka United Democratic Party (UDP), Dr. Jemino Mawthoh ha ka sngi U Blei u la ong ba lada kylla dien biang ban pyntreikam ïa ka National Education Policy (NEP) kan ktah jur ïa ki samla pule ha ka jylla.
“Lada kylla dien biang ïa ka rai kan ktah jur ïa ki samla pule. Kumta to ngin buh shwa ïa ki samla pule hakhmat,” ong u Bah Jemino.
Katei ka jingkren jon gu kadei hadien ba ka la mih ka jingdawa na ka North Eastern Hill University Teachers’ Association (NEHUTA) bad ka Meghalaya College Teachers’ Association (MCTA) ban kylla dien biang shwa ïa ka rai ban pyntreikam noh ïa ka NEP.
Shuh shuh u la ong, “Da ka jingdon mynta ïa ka State Education Commision, ngi lah ban pynbeit ïa ki jingeh bad ki jingsngew ba la pynpaw da ki jaka pule bad ki paidbah ha shwa ban ïaid shakhmat.”
Da kaba kam ba jan baroh ki jaka pule ki la ïaid shakhmat ban pyntreikam ïa ka NEP, u Bah Jemino u la ong ruh, “Ka council jong ki Principal ki la dep mynjur ban pyntreikam. Ym shym don ki college kiba pan por ban pyntreikam ïa ka.”
Shuh shuh u ong ba u pynsngewlang ïa ka jingsngew jong ki paidbah bad ki kynhun nonghikai namar ki dei kiba shong nongrim namar ki donkam ban pynbeit ïa ki jingeh ba kynduh da ki jaka pule. Da kaba kubur ba ha ka jingtreikam kin don ki jingeh hynrei u ong pat ba donkam ban ïakhun ïa ki jingeh bad ïaid shakhmat ym ban sah shadien.
Nalorkata, utei u heh UDP u ong ruh dei ruh ban shim kabu ïa kane na ka bynta ban pynkylla ïa ka jingeh sha ka kabu ksiar. Katkum ka jingong jong u, ka jylla kam shym la lah ban pyntreikam ïa ka Choice Based Credit System ha ka undergraduate level naduh u snem 2016 da kaba ong ba dei na kata ka daw ba sa duna ki major paper lada nujor bad kiwei ki jaka pule ha ka ri.
“Ki samla pule kiba leit pule ha kiwei pat ki jaka pule shabar jylla ki shem jingeh namar kane bad shem jingeh wat ha ka CUET bad kiwei ki competitive exam. Kumta, donkam ban pynkylla thymmai noh ïa ka undergraduate,” u la bynrap biang.