Lait im i heprit na ka jingshah rong um, 1 kynta neh hapdeng wah bah ha Lawkhla Mawlong

Shillong, Nailur 17 : I heprit Banrilang Rani iba la lait im na ka jingshah rong ha ka wah bah ha ka Shnong Lawkhla Mawlong kaba hap ha Mawphlang Constituency East Khasi Hills District, i don hapdeng ka met ba koit ba khiah bad bteng ruh ia ka jingpule wat hapdeng ki jingeh ba i ïakynduh ha kaban wad ïa ka jingnang jingstad.
Khnang ban tip kham bha shuh shuh halor ka jingjia hap bad shah rong ha katei ka wah bah, u Mawphor dalade hi ha ka 15 tarik Nailur 2023 u la hiar sha Lawkhla Mawlong ka shnong ba itei i heprit i la syntuid.
I heprit Banrilang Rani iba dang pule klas 9 ha ka skul Lawkhla Mawlong Secondary School, idei i khun ba lai jong ka Kong Roybon Rani bad u Bah L. Syiemiong bad idei na ka Shnong Mawsyntiew ka shnong ka bym pat don surok haduh mynta mynne.
I heprit Banrilang man ka sngi i ju leit sha skul ha Lawkhla Mawlong da kaba ïaid kjat napdeng khlaw, kiew bad kam ïa ki lum ki wah bad ïa ka jingkieng bad shim por shiteng kynta eiei ban poi sha skul.
Hynrei ha ka 12 tarik Nailur 2023, ka la wan jia ka jingjia ba i heprit Banrilang Rani i la kum syntuid ha katei ka wah bah kaba ïaid narud Shnong Lawkhla Mawlong.
I heprit Banrilang Rani i la ïathuh ba man ka sngi i ju mih na ïing ha ka por 8 shiteng bad i ju leit ïaid na sha kawei pat ka lynti, hynrei ha katei ka sngi namar ba i la mih kham slem, kumta i la ïaid noh na sha kawei pat ka lynti kaba kham jan.
Hynrei haba i la kam ïa katei ka wah kaba dei ruh artad ha ka por ba saw ka um i khlem ïohi ïa kino ki maw kiba long ban iuh, kumta i la kum iuh bakla bad syntuid bad ka um ka la rong noh ïa i sha kham pdeng katei ka wah bah.
Hynrei donbok ba ka pla kot ba ka kit shadien ka la leit bnoh ha uwei u maw uba don hapdeng wah ha kaba itei i heprit i la ïoh ban bat tad haduh ba ki paidbah ka Shnong Lawkhla Mawlong kin wan ban ai jingïarap bad pyllait im ïa ka. I heprit Banrilang i la ïathuh ruh ba i la neh hapdeng katei ka wah bah jan haduh shi kynta.
Ka Kong Roybon Rani kaba dei ka kmie ka la ïathuh ba ka la ïoh jingtip tad haduh ka por mynmiet bad ka la ai khublei ïa ki paidbah ka Shnong Lawkhla Mawlong kiba la ïoh ban pyllait im ia ka khun jong ka.
Katkum ka jingïathuh ka kmie jong i heprit Banrilang Rani, ba ki ju mad jingeh shibun na ka daw ka jingbym don surok khamtam ha ka kit ka bah, ka pang ka shitom ba ki hap ban ïaid kjat bun bun kynta ban leit thied leit pet na Mawsadang ka shnong kaba don marjan bad ka Tyrsad.
U Bah Swotsharlin Marbaniang Rangbah Shnong jong ka Shnong Lawkhla Mawlong u la ai khublei ïa ki nong shong shnong kiba la lah ban pyllait im ïa itei i heprit. U la ïathuh ba na ka por sha ka por ka Shnong ka la ju kyrpad na ki nongmihkhmat ban shna noh da ka jingkieng ha katei ka wah namar kiba bun ki nong shong Shnong haba ki leit sha ki jaka rep ki ju ïaid na katei ka wah da kaba jam lyngba ki maw. Hynrei ha ka por lyuir bad ba ju slap kim lah ban jam sha shilliang ka wah. Bad u la ïathuh ba haduh mynta ym don kiba patiaw lem ïa kaei kaba ki paidbah ki ud.