Nongpoh, Nailur 17: “Dang lah ba shah kheiñ beaiñ ka KSU ban ba jot ka jaitbynriew, kumba ka KSU ka dei kawei na ki seng kaba dang pynim ïa ka jaitbynriew, kaba ïaid ha ka lynti jong ka jingïaishah bad ka KSU kam ju don bynta ha ki kam saiñ hima sima, hynrei ka ïaid ha ka mon ba laitluid,” ong u President ka KSU u Samla Lambokstar Marngar haba kren kum u nongïalam ha ka jingpynskhem ïa ki nongkitkam jong ki ar tylli ki shnat treikam kiba hap hapoh ka KSU North Khasi Hills Eastern Border Area kata ka KSU Umktieh Unit bad ka KSU Mawtneng Unit ha ka sngi Saitjaiñ.
U la kyntu ruh ïa ki nongïalam ba la shah pynkhamti kam ha kane ka sngi ba ki dei ban long kiba sngewrit bad khamtam ban ai ka jingïatreilang bad ka Dorbar Shnong namar lada ki samla, ki longkmie bad ki rangbah ki ïatreilang, ka long kaba suk ban khanglad ïa ki kam sniew kiba wan pynjot ha ka imlang ka sahlang.
U President jong ka KSU North Khasi Hills District Unit u samla Ferdynald Kharkamni haba kren ha kane ka jingïalang u la kitbok kitrwiang ïa ki dkhot jong ka KSU Umktieh unit bad ka KSU Mawtneng unit kiba la pynïasnoh bad ka KSU bad u la kyntu ïa ki samla ban long kiba adkar bad ban kiar na ki kam basniew bad ban ïatreilang bad ki kynhun Dorbar Shnong khnang ban rat dyngkhong ïa ki jingsniew khamtam ïa ka jingjyllei jong u drok.
Ha ka jingpynskhem ïa ki nongkitkam ba thymmai jong kine ki ar tylli ki Unit la sakhi lang da u General Secretary ka KSU NKHD Unit u Samla James H Mawphiang, u President KSU NKHEBA u samla Banjop Maring, u Secretary Shnong ka Umktieh Pyllun u Bah Romesh Lyngdoh, ka President jong ka Seng Longkmie Pyllun ka Kong Bernadeth Thabah, u Secretary Shnong jong ka shnong Mawtneng u Bah J. Shadap bad ki nongïalam jong ka KSU NKHD Unit bad KSU NKHEBA.
La pynskhem ïa u samla Richardroy Lyngdoh Nonglait kum u President jong ka KSU Umktieh unit bad u Samla Pyrkhatbha Shabong kum u President jong ka KSU Mawtneng Unit ryngkat ki dkhot da u samla Lambokstarwell Marngar.
