Shillong, Nailur, 17: Ka Sorkar Jylla ka la pynlut T.39.88 klur shi bnai ban siew tulop sha ki 32 tylli ki Deficit College, People’s College, Adhoc College bad ki lumsum College ha ka jylla.
Na kane, T. 320,868,676 la pynlut na ka bynta ki 13 tylli ki Deficit College, T. 56,198,954 sha ki 8 tylli ki People’s College, T. 21,276,960 sha ki 6 tylli ki Adhoc College bad T. 500000 sha ki 5 tylli ki lumsum College, katkum ka jingtip ba la ïoh lum.
Ki 13 tylli ki Deficit College ki kynthup ïa ka St Edmunds’s College (T. 36038293), St. Mary’s College (T. 34803054), St. Anthony’s College (T. 51018119), College of Teacher Education (PGT) (T. 5086777), Sankardev College (T. 34858193), Synod College (T. 27153033), Shillong College (T. 38816778), Lady Keane College (T. 38813119), Shillong Commerce College (T. 6664360), Union Christian College (T. 26664866), Mendipathar College (T. 4878050), Don Bosco College (T. 11458648) bad Seng Khasi College (T. 4615386).
Ki 8 tylli ki People’s Colleges ki long ka Ampati Degree College (T. 5854662), Shangpung College (T. 4861503), Jaiñtia Eastern College (T. 6611058), Tirot Sing College (T. 7425143), Nongstoiñ College (T. 9759882), Nongtalang College (T. 9299447), Ri Bhoi College (T. 7899892) bad Tura Christian College (T. 4487367).
Ki 6 tylli ki Adhoc College ki long ka Durama College (T. 4129344), Tikrikilla College (T. 1854048), Acheng Rangmanpa (T. 1871040), Sngap Syiem College (T. 4129344), Raid Laban College (T. 5076864) bad ka Women College (T. 4216320) katba ki 5 tylli ki Lumsum College ki kynthup ïa ka Thomas Jones College, Bormanik College, St Mary’s CTE, Phukan College bad ka Kazi Zaman College.
Dang shen ka Sorkar Meghalaya ka la pan jingkheiñ ban ïanujor ïa ka jingohdor bai pule ba la shim da ki Private College bapher bapher kiba don ha ka jylla.
Ka bai pule ba la ohdor da ki shlem pule ba la pynïaid da ki riewshimet ka la pynbitar ïa ki kmie ki kpa bad ïa ki samla pule watla ki dei kiba la ïoh jingkyrshan jingïarap na ka Sorkar.
U Myntri ka tnat Pule Puthi ka Sorkar Jylla u Rakkam A. Sangma u la ong ba ka Sorkar kan sa shim rai ha kaba ïadei bad ka jingohdor ïa ka bai pule ynda la ïoh pdiang ïa ka Comparative Data.
“Ngi la pan ïa ka Comparative Data (kaba ïadei bad ka jingsiew bai pule) na baroh ki College. Ngin ïai ap bad ngin sa peit. Hynrei, ha nga shimet, nga kwah ban kyrpad ïa ki khlieh nongpynïaid jong ki kolej bad ïa ki Management jong ki, namarba ka jingïarap kaba bun (ba la ai sha ki) lada ki pyrkhat bha, kan pynsting ïa ki samla pule namarba ka jingthmu bad ka thong ban ai jingïarap sha kine ki shlem pule ka long ba kin ai jinghikai hi ïa ki samla pule jong ngi,” u la ong.
U Sangma u la ïathuh, ha ki ar snem ba la leit noh, ka tnat Pule Puthi ka la mang pisa palat 509 tam ki Post na ka bynta ki nonghikai bad ki nongtrei jong ki 20 tylli ki College bad kane ka pyni ba ka Sorkar ba la ïalam da ka NPP ka buh hakhmat eh ïa ka pule ka puthi.
Ka Sorkar ka la mang pisa na ka bynta palat 100 tylli ki post ïa ka St Mary’s College Shillong, 18 tylli ïa ka PGT College, 30 tylli ïa ka Don Bosco College Tura, 18 tylli ïa ka Seng Khasi College, Shillong, 55 tylli ïa ka UCC, 119 tylli ïa ka St Anthony’s College, Shillong, 15 tylli ïa ka Shillong Commerce, 20 tylli ïa ka Mendipathar College (bad ka la kynjoh sha ka 34 tylli namar ka People’s College) bad 72 tylli ïa ka Sankardev College, 71 tylli ïa ka Synod College, 85 tylli ïa ka Lady Keane College bad 82 tylli ïa ka St Edmund’s College.
Ha ka Adhoc Pattern, 22 tylli ïa ka Women College, 34 tylli ïa ka Raid Laban College, 12 ïa ka Tikrikilla (bad mynta ka la kynjoh sha ka 32 tylli namar ka People’s College) bad 23 tylli ïa ka Durama College.
