Nongstoiñ, Nailur 21: Kum ka jingkynmaw burom ïa ka lyngkhuh snem kaba phra jong ka jingkhlad noh jong u (L) bah Hopingstone Lyngdoh, u ba la khlad noh ha ka 26 tarik Nailur jong u snem 2016, ki nongïalam ka Hill State People Democratic Party kin pynlong ïa ka jingrakhe kynmaw burom ha Langpih ha sngi hatmajai ka ban wan, kata ha ka 26 tarik ha ka jaka ba la tei ïa u mot sah jingkynmaw ïa utei u nongseng jong ka party bad u nongïalam ban dawa ïa ka jylla ba pura.
U bah K.P.Pangñiang president rangbah ka party haba pyntip ha u nongthoh khubor, u la ong ba kumba ju leh man la u snem, ha katei ka sngi rakhe ïa ka lyngkhuh snem jong, kin don ki riew rangbah bad ki MLA jong ka party ki ban wan ïa shim bynta lang ryngkat ki nongshong shnong katei ka thaiñ.
U bah Pangñiang u la ong ruh ba ka jingtei ïa u mot sah jingkynmaw ha katei ka jaka, kam dei kaba shu tei nam hynrei ka don ïa ka jingmut kaba jylliew bha, namar lada ym dei na ka jinglah jong u (L) Maieit Hoipngstone, ban pynrung ïa ka Langpih Sector ha ka Census bad ka Electoral roll jong ka United Khasi & Jaintia Hills, ha ka por ba u long u MLA/MDC naduh u snem 1962 haduh 1967-71 bad MDC naduh 1958-1967, 1967 haduh 1971 bad u la long ruh kum u Executive Member u ba peit ïa ka Inter District boundary ha ka por ba ka sorkar Assam ka dang synshar.
U la ong ruh ba ïa ka jingpynrung ïa katei ka sector ha ka UK&J Hills la mynjur ruh da u P.Chaliha Myntri Rangbah ka Assam ha katei ka por. U la ong ba lada ym dei na ka jinglah jong u ban pynrung ïa katei ka sector ha ka United Khasi & Jaiñtia Hills, kam don jingmut shuh ban dang ïa kren ba katei ka thaiñ ka dei ka bynta jong ka West Khasi Hills.
Lada ïa ka jingpynbeit ïa u pud u sam bad ka jylla Assam, yn pynshong nongrim katkum kitei ki jaka ba u (L) Maieit Hopingstone Lyngdoh u la pynrung ha ka Census bad ka Electoral roll naduh kitei ki snem, kan ym don jingeh satia bad ym don jingartatien ei ei ba ka sorkar Assam ruh kan ïa mynjur, namar ka jingwan kyntur pud jong ka Assam haduh Mawsikar ka dei kaba la shu leh jubor.
Shuh shuh, u la ong ba ha katei ka por u (L) Maieit Hoping u la pynrung ruh ïa bun tylli ki skul ha ka thup ha ka Khasi Hills Autonomous District Council. Kitei ki skul ki dei ka Langpih DC LP Skul, Mawdiangsnam DC LP skul Umtap DCLP skul Nongma Deficil LP skul. Kitei ki skul ki la dei lypa ki mawnongrim kiba pynshisha ba katei ka thaiñ ka dei hok ka bynta jong ka West Khasi Hills.
