Ka Monolith Festival, penshon MDC bad katto katne ki Bill ha ka Dorbar Kyrpang KHADC
Shillong, Nailur 21 : Ka Executive Committee jong ka Khasi Hills Autonomous District Council (KHADC) ha ka sngi Palei ka la kynduh lang ban ïa kren halor kiba bun ki mat kiba ïadei na ka bynta ka Dorbar Kyrpang kaban sdang naduh kane ka Sngi Thohdieng bad ruh kumjuh na bynta ka Monolith Festival kaban sa long ha u Nohprah mynta u snem.
Haba kren bad ki lad pathai khubor, u Deputy Chief Executive Member ka KHADC, Bah PN Syiem u la ïathuh ba katto katne ki mat ba ka EC ka shim ka long haba ïadei bad ka supplementary demand na bynta ki jinglut jingsep jong ka Council ban pynlong ïa ka Monolith Festival.
Katkum ka jingong jong u, baroh ki jinglut jingsep yn bei tyngka da ka tnad Tourism jong ka sorkar jylla hynrei na ka liang ka sorkar ka hap ban pynkhreh katto katne na bynta kino kino ki jingdonkam kyrkieh kiba lah ban mih ha katei ka tamasa.
“Na ka Council ngi hap ban mang katto katne lehse na bynta ki jingdonkam ba malu mala hangne hangtai haba ïadei bad ka monolith festival. Kaba ar pat ka long na bynta ka penshon jong ki katto katne ki MDC kiba la leit sha High Court ban dawa ïa ka penshon jong ki. Na ka liang jongngi, ngi la shu biang ha ka supplementary demand na ka bynta ka jinglut jingsep kaba ïadei bad ka penshon jong ki,” u la ong.
La ïathuh ruh ba la mang katto katne na bynta ka Legislative khnang ba kin ïoh ban pynlut na bynta katto katne por shwa ka Financial Year. U la pyntip ruh ba la buh katto katne na bynta ka tnad Education.
La ïathuh ba ha kane ka Dorbar Kyrpang yn wanrah ïa ka Administration of Elaka Second Amendment Bill 2023 kan ïarap ban tehlakam ïa ka rung ka mih jong ki briew kiba nabar ha ki shnong ki thaw ha kaba yn don ka Social Vigilance Committee kaban yn khlieh da ki nongïalam shnong ryngkat ka jingdonlang ki dkhot ka Seng Samla bad Seng Longkmie.
“Ïa ka yn thaw da ka Dorbar Shnong ha kaba ka kamram jong ki ka long ban peitngor ha kino kino ki kam sniew ha shnong ha thaw ban pynneh ka suk ka sain bad treilang ryngkat ryngkat bad ka sorkar, District Council, ki Hima bad ki bor distrik ruh.Ngi kwah ban kdew ïa kane ha ka ain namar kaei kaba ngi leh kan long katkum ki kyndon ka ain,” bynrap shuh shuh u Deputy CEM.
Shuh shuh u Deputy CEM u la pyntip ba yn wanrah katto katne ki Bill ha kane ka Dorbar Kyrpang kynthup ïa ka Clan Bill.