Shillong, Nailur, 21: Ki Pulit tang hapoh 48 kynta ki la ïohkem ïa ki arngut ki briew kiba la suba ba ki dei kiba donkti ban dkhat jubor ïa ka jingim jong u Bah Wiliam Nongrum, 36 snem ka rta uba dei na ka shnong Khanduli.
Ha u kyrwoh ba la phah da u Superintendent of Police ka East Khasi Hills u Bah S. Nongtnger, la pyntip ba ha ka miet sngi Baar ha ka por 11:00 baje mynmiet la ïoh jingtip ba uwei u briew u la thiah lyngktop hapdeng ka jingbym tipbriew harud surok Laitkor.
Marmar ki Pulit ki la leit sha kane ka jaka bad lap ïa uwei u briew uba la thiah hapdeng ka jinglyngkien jong ka snam hapoh ka phyllaw jong kawei ka karkhana shna kali kaba dei jong u Bah Farid Mukhim ha Laitkor Mawrie, Lumheh.
Hadien ba la tohkit bniah, la lap ba ki don ki dak mong ha ki bynta jongka khlieh jong u briew bad i kumba u la ïap. Hadien ka jingsuba ba u la ïap, la pyntip marmar sha ka kynhun Crime Scene Unit ban wad ksai bad ïa ki sakhi na kane ka jaka kaba une u briew u la ïap. La lap ruh ïa uwei u lakam ñiah kali ba la suba ba la pyndonkam ban leh ïa ka kam runar bad ïa uwei u bitor um bad shiteng bilor ka kyiad la kurup noh na kane ka jaka.
Ha ka step sngi Balang, ïa ka met jong une u rangbah la pynkynriah noh sha NEIGHRIMS Hospital, Shillong. Ki bahaing ki la wan kam trai bad ban pyntip ba u lanot u dei uba la tip kyrteng kum u William Nongrum 36 snem ka rta na ka shnong Khanduli.
Hadien ba la pyndep ïa ki jingdonkam katkum ka aiñ, la aiti noh ïa ka met sha ki bahaing hasem ban pyndep ïa ka jinglehniam bakhatduh.
Ki Pulit ki la registered case ïa kane ka jingjia ha Madanrting Police Station hapoh ka Section 302 IPC bad arngut ki suba donkti ki la shah kem hapoh 48 kynta.
