Nongstoiñ, Naiwieng, 1: U Deputy Commissioner (Election) jong ka West Khasi Hills District, u la pyntip ba ka Election Commission jong ka Ri India kan pynlong ïa ka jingpynrung kyrteng thymmai biang ïa ki nongthep vote kiba la dap 18 snem ka rta kat haduh ka 01.01.2023. Ki briew jong ka Sorkar (Booth Level Officers), kin wan sha ki shnong kata ha ki Polling Station ne jaka thep vote naduh ka 9 tarik u Naiwieng haduh ka 8 tarik Nohprah, 2022.
Lada don kino kino ki jingbakla lane jah kyrteng ruh ha kaba ïadei bad ka jingpynrung ïa ki kyrteng lane ki dur ha ka Photo Electoral Roll, ki lah ban leit ujor ha kitei ki sngi ba la kdew. Kiba la dap 18 snem ka rta kat haduh ka 01.01.2023 ki dei ban pynbiang lypa ïa ki kot jingpynshisha, kum ïa ka Birth Certificate, School Certificate, Baptismal Certificate, I.D Card, Driving License bad ar tylli ki Pass Port size.
