Nongstoiñ, Naiwieng, 1: Ka seng UHM Mawshynrut Circle hapoh ka jingïalam jong u President ka circle u samla Stevenson Nongsiej, ka la lap ba ka skul SSA kaba don ha Mawlai Umdang Mawshynrut, ka la jot la pei bad wat ki tin tap tnum ki lah pei lut bad ki ben ki miej ki lah pyut lut. Da dei ki por slap kam long shuh ban pynshong khynnah skul ha kamra klas bad ki hap shong ruh ha madan, nangta ki nonghikai ki hap pynlong skul ha kamra jong ki nonghikai.
Ka seng ka la ther tyngeh ba ha ka jingshisha, kum kata ka ïing skul ba pynïoh ïa ka jingnang jingstad bad ban kyntiew ïa kata ka jingnang jingstad, hynrei ban ïoh ïa kata ka jingnang jingstad, ki khynnah skul ki hap shong ha madan, namar kim don ïa ki ben ne ki miej na ka bynta jong ki khynnah skul bad ïa ki nonghikai.
Kane ka long ka jingleh meinah jong ka sorkar bad na ka education department ruh ka leh shilliang bad iehbeiñ ïa ki skul kiba don ha nongkyndong. Ka long ruh kaba shai ba ka sorkar bad u MLA kane ka constituency kim peit ïa ki duk ki suk bad ïa ki kam pule dangle ha nongkyndong. Kumjuh ruh ka managing committee jong ka skul kam patiaw ïa ka jinglong jingman jong ka skul, ne ban wad ïa ki jingïarap na ka bynta jong ka skul, kum ki class room bad ka paiñkhana jong ki khynnah skul.
Ka office jong ka DSEO ka dei ban peit lane dei ban leit jurip ïa kine ki school ba don ha nongkyndong, da kaba peit nuksa tang ïa kane kawei ka skul kaba la isangsot haduh katta katta. Ka seng ka pynpaw ba imat ki dang bun kiwei ki skul kiba kham palat ka jinglong jingman ban ïa kane ka skul.
Ka ophis jong ka DSEO ka dei ban shimkhia ïa kum kane ka skul ba ngat kum kane ka apot. Nalor kata ka jinghiar ki jingpule dangle ka dei namar u nongmihkhmat bad ka sorkar, kim ïa shimkhia kat ïa ki skul ba pynïoh ïa ka jingnang jingstad bad ka seng kan sa tih bniah ïa ka jingshisha.
