Shillong, Rymphang 22: Ka Reliance Foundation Youth Sports (RFYS), ha ka jingïatreilang bad ka All India Football Federation (AIFF), ka la khreh ban pynlong ïa ka Women’s Football Referees Workshop ha Shillong ha ka 8 bad 9 tarik u Lber, kum shi bynta jong ka jingthmu ha ka ri baroh kawei ban pyntbit bad ai mynsiem ïa palat 170 ngut ki official kynthei. Kane ka jingïalang, kaba thmu ban pynkhlaiñ ïa ka rukom pynïaid ha kaba ïadei bad ki referee bad ban pynroi ïa ka phutbol India, kan lumlang ïa ki official kiba kwah ban long naduh Meghalaya bad na ki Jylla ba marjan.
Ka jingïaid lynti jong kane ka jingïalang kan sdang na Srinagar (21-22 tarik Rymphang) bad bteng ha Kolkata (1-2 tarik Lber), Shillong (8-9 tarik Lber), Chennai (15-16 tarik Lber), bad Mumbai (19-20 tarik Lber).
Ka thei-ïalehkai ba la kham rangbah jong ka kynhun phutbol ka ri India ka Ngangom Bala Devi ka la ong, “Ka kam pynïaid ïa ki jingïalehkai (Refereeing) ka dei ka kam kaba eh bha bad Nga don ka jingburom kaba khraw ïa baroh ki nongpynïaid ïalehkai kiba pynthikna ïa ka jingïalehkai kaba hok ha ka phutbol India.
Kane ka workshop ban pyntbit ïa ki official ba la pynlong da ka Reliance Foundation ha ka jingïatreilang bad ka AIFF kan ai bor ïa ki ban pynïaid kham man ka por ïa ki jingïalehkai hapoh ka ri bad bar ri. Nga sngewkmen shibun ban ïohi ba ki jingthmu kum kine ki ju jia man ka por na ka bynta ka jingpynbha kaba ïai bteng bad ban kyntiew ïa ka phutbol ha India.”
Ha man la ki workshop yn ïohi ïa ka jingwan ïashimbynta jong ki match official na ki thaiñ ba marjan. Nuksa kum ka workshop ha Srinagar kan pdiang sngewbha ïa kiba wan ïashim bynta na Chandigarh, Punjab, Jammu, Himachal Pradesh, bad kiwei kiwei ki thaiñ ba marjan. Ki nonghikai kiba la tbit bha jong ka AIFF kin don bynta ban ai jinghikai, kynthup ïa ka Uvena Fernandes—ka assistant referee ba marwei na India ban ïoh pynïaid ïa ka FIFA World Cup final—bad ka Maria Rebello, ka kapten barim jong ka kynhun phutbol ki kynthei jong ka ri India bad kaba la don ha ka thup kyrteng ki referee jong ka FIFA.
Ka phutbol jong ki kynthei ha India ka la mad ïa ka jingkiew kaba stet, ha kaba ki kynthei ki la nang bun kiba shim ïa ka bynta kum ki player, coach, bad ki official. Kumba 40 ngut ki nongpynïaid (match official) kynthei ki la ïashimbynta ha ki prokram jong ka RFYS bad ka Reliance Foundation Development League (RFDL) mynta ka samoi, kaba pynpaw ïa ka jingroi jong ki sap.
Ha u Naiwieng, 2024, ka RFYS ka la pynlong ïa ka workshop na bynta ki nongpynïaid jong ka Indian Women’s League (IWL), da kaba pynleit jingmut ha ka ban pynbha ïa ka jingtbit ha ka liang ka jingstad bad ka rukom pynïaid kaba beit ha ki jingïalehkai.
Naduh u snem 2022, ka RFYS ha ka jingïatreilang bad ka AIFF bad kiwei kiwei ki paralok ba synranlang, ka la pynlong ïa bun tylli ki workshop kiba kum kine, kaba ai jingmyntoi ïa palat 620 ngut ki coach bad ki nongpynïaid (official) kynthei bad ka ai bor ïa ki ban long ka bynta ba kongsan ha kaba kyntiew ïa ka phutbol ha India.
