Yn pynlong ka NSO (FOD), Shillong ïa ka 81st Round Socio-Economic Survey jong ka NSS

Shillong, Jylliew 09: Ka Field Operations Division (FOD) jong ka National Statistics Office (NSO) hapoh ka Tnad Statistics & Programme Implementation ka la pynlong ia ki jingwad bniah ha ka ri baroh kawei halor ki bynta bapher bapher jong ka imlang sahlang, ka ïoh ka kot, ki karkhana bad ki jingkheiñ jingdiah ha ka rep ka riang bad kiwei kiwei naduh ba la sdang ïa ka ha u snem 1950. Ka bynta kaba 81 jong ka National Sample Survey (NSS) kan sdang naduh u bnai Naitung 2026 haduh Jylliew 2027 ha kylleng ka ri.
Ka bynta kaba 81 jong ka NSS kan kynthup ïa ka Situation Assessment of Agricultural Households (SASH), All-India Debt and Investment Survey (AIDIS) bad ka Migration Survey. Kine ki jingpeit bniah ki thmu ban pynmih ïa ki dak ba kongsan shaphang ki jingdon jaka bad ki jingri jingdup, ka jingmih, ka kamai kajih, ki jingdon jingem kiba ai jingmih, ka jingkit ram, ki rukom rep, bad ka jinglah ban ïoh ïa ki teknoloji ha ka kam rep. Yn lum ïa ki jingtip ba bniah shaphang ki lad kamai na ka kam rep bad ki kam bym ïadei bad ka rep ka riang, ka jingpynlut, ki jingdon jingem, ka jingpynmih pisa, bad ka ram jong ki ïing. Nalor kata, ka Migration Survey kan pynleit jingmut ha kaba lum ïa ki jingtip ba bniah shaphang ki rukom buhai shnong, kynthup ïa ki jinglong bad ka jingheh jong ka jingleit buhai shnong na ki longïing. Ki jinglap na kine ki jingwad bniah kin ai ki jingshem kiba kordor shaphang ka jinglong jingman ha ka imlang sahlang bad ka ïoh ka kot jong ki longïing bad kin long kum ka sakhi kaba kongsan na ka bynta ban thaw ïa ki polisi kiba bniah bad ka jingthmu pynroi.
Ban pynkhlaiñ ïa ka bor treikam bad ban pynthikna ïa ka jinglum jingtip kaba bha, ka National Statistical Office (Field Operations Division), Regional Office Shillong, ka pynlong ia ka Regional Training Camp kaba saw sngi na ka bynta ki nongtrei naduh ka 8-10 tarik u Jylliew 2026 ha ka Conference Hall jong ka, bud sa ka prokram ai jinghikai ha ka 11 tarik Jylliew 2026. Ha kane ka prokram la ïashim bynta da ki ophisar bad ki nongmihkhmat na ka Directorate of Economics and Statistics (DES), Sorkar Meghalaya, kaba kyntiew ïa ka jingïatreilang kaba kham khraw ha ki kam jingkheiñ jingdiah.
Haba ai jingkren ha ka jingïalang plie paidbah, u Bah Marvin L. S. F. Marwein, Joint Director ha ka Directorate of Economics and Statistics, Sorkar Meghalaya, u la ban jur ïa ka bynta kaba kongsan jong ki jingtip jong ka National Sample Survey (NSS) kum u mawjam na ka bynta ka jingsynshar kaba don jingtip.
U la ong ba ki jinglap jong ka NSS ki ai ïa ki jingai jingmut kiba kongsan na ka bynta ka jingpynkhreh kam jong ka sorkar, ka jingthaw ïa ki polisi, ka jingmang pisa, bad ka jingshim rai kaba pynshong nongrim ha ki sakhi ha ki kyrdan jong ka jylla bad ka ri. U la ban jur ruh ïa ka jinglong ba kyrpang jong ka imlang sahlang bad ka ïoh ka kot jong ka Meghalaya ba kaba bun ka jaka ha ka jylla ka dei kaba long trai da ki kynthei-ka jinglong kaba kham niar bad kaba kyrpang. U Bah Marwein u la ban jur ruh ïa ka jingdonkam ban pynthikna ïa ka jingbeit jong ki jingtip, da kaba ban jur ba ka jinglong kaba thikna bad kaba lah ban shaniah ka long kaba kongsan bha na ka bynta ka jingseisoh jong ki polisi bad ki sienjam na ka bynta ka roi ka par.
Ïa ka jingkren ba kongsan la ïoh na u Orenthung Patton uba dei u Deputy Director ka Regional Office, Shillong. Ha ka jingai jingkren jong u, u la ban jur ïa ka jingdonkam ban lum jingtip kaba thikna bad kaba lah ban shaniah lyngba ka jingpyndonkam ïa ki digital tablet, da kaba ban jur ïa ka bynta jong ki ha kaba kyntiew ïa ka jingtreikam bad pynduna ïa ki jingbakla ha ki jaka treikam. U la batai bniah shaphang ka jingdonkam jong ki jingpeit bniah kiba dang ïaid shakhmat-Ka Situation Assessment of Agricultural Households (SASH), ka All-India Debt and Investment Survey (AIDIS), bad ka Migration Survey -kiba ai ïa ki jingsngewthuh kiba kongsan shaphang ka jinglong jingman ha ka imlang sahlang, ka ïoh ka kot jong ki longïing kiba trei ha ki kam rep, ki rukom jong ka jingsah ram bad ka jinglong trai ïa ki jingdon jingem, kumjuh ruh kum ka ki daw jong ka jingwan buhai shnong. U la ban jur ba ki jingtip ba la ïoh na kine ki jingwad bniah ki long kiba kongsan bha ban saindur ïa ki prokram ba ïadei bad ka bha ka miat ba la buh thong, ban bishar bniah ïa ka jingktah jong ki polisi ba la don lypa, bad ban thaw ïa ki lad jingïarap ba don nongrim ha ki jingtip kiba thmu ban kyntiew ïa ka roi ka par kaba kynthup lang bad kaba ïaineh.
Da kaba pynshlur ïa ka jingïashim bynta kaba radbah, u la kyntu ïa ki nongïashim bynta ban shim kabu ïa ka jingai jinghikai, ban pynshai ïa ki jingartatien jong ki, bad ban pynkhreh ïalade ban rung sha ka kam kum ki “nongïakhun jong ka data” kiba aiti lut. U la kyntu ruh ïa ki paidbah ba kin ai ka jingïatreilang da kaba ai ïa ki jingtip kiba thikna, kiba donkam na ka bynta ban pynmih ïa ki jingkheiñ kiba lah ban shaniah na ka bynta ka Jylla Meghalaya bad ka ri hi baroh kawei.