Pdiang bad ïaroh u Conrad ïa ka rai jong ka UNC ba pyllait ïa 14 ngut ki Kuki

Shillong, Jylliew 9: U National President jong ka National People Party uba dei ruh u Myntri Rangbah ka jylla Meghalaya u Conrad K Sangma ha ka sngi Ba-ar, ula pdiang ïa ka rai jong ka United Naga Council (UNC) ban pynlait ïa 14 ngut ki Kuki ba shah set ha Senapati, haba shim ïa ka kum ka “jingsngew para briew” bad kyntu ïa ki seng Kuki ba kin bud lang da kaba pynlait noh ïa ki 6 ngut ki Naga ba ki rahbor.
U Conrad u la ai ka jingiaroh ïa kane ka seng ki Naga namar ka jingjied ïa ka jingsngewlem ha ka jaka ka jingia umsnam ha kum kane ka por kaba kynrum kynram hapoh ka jylla Manipur.
“Nga pdiang bad ïaroh shikatdei eh ïa ka rai jong ka United Naga Council (UNC), ka Naga Triba Hohos, ki Sengbhalang, ki nongialam ka Jaidbynriew bad baroh ki kynhun ba donkti ba ïarap ha kaban pynlait noh ïa ki 14 ngut ki Kuki kiba la shah set ha Senapati.Kane ka jingleh ba sngew para briew ka pyni ia ka rukom long tynrai ki paid Naga, bad ka jingngeit jong ki ka pynskhem ia ka jinglong kaba sngewlem, ka burom, ka jingpyniasuk bad burom ïa ka jingim briew” ula ong.
Kane ka sienjam ka phah ïa ka khubor ka jingkyrmen kaba khlain bha sha Manipur bad ka thain Shatei Lam Mihngi hapdeng kine ki jingïaumsnam kiba dang ïai bteng.U Myntri Rangbah ula kyntu ïa ki Seng jong ka Jaidbynriew Kuki ba kin pynlait noh khlem ka jingteh kyndon ïa ki hynriew ngut ki Naga kiba shah rahbor, haba pynpaw ba ka dei ka sienjam ba kongsan sha ka jingpynkoit.
U Conrad ula bynrap ba ka jingïai bteng ban set ïa ki kan nang pynjlan ïa ki jingmad ïa ki jingjynjar bad pynslem ïa ka jingpyrshang ban wanrah ïa ka jingsuk. “Ka jingïai bteng ban set ïa kino kino ki riew paiadbah ka nang pynslem ïa ka jingjynjar jong ki longïing bad ka Jaidbynriew bad pynslem ruh ïa ka kam ban pynkoit kaba ka Manipur ka donkam eh haduh katta katta” ula ong.