Yn pynlong ïa ka Mock Exercise 2025 ha Mawkyrwat

Mawkyrwat, Lber 18: U Deputy Commissioner bad Chairman jong ka District Disaster Management Authority, South West Khasi Hills District u la pyntip paidbah ba ïa ka State-Level Mock Exercise 2025 halor ka jingkhynñiuh jumai bad ki jingjia kiba ïa dei bad kane yn pynlong ha kajuh ka por ha kylleng ki district bad ki sub-division ynsa pynlong ha ka 20 tarik mynta u bnai bad ïa kane yn sa pynlong ha ka jingïatreilang bad State Disaster Management Authority (SDMA) lem ruh ka National Disaster Management Authority (NDMA).
Ïa kane ka Mock Exercise kan kynthup da ka jingïashimbynta jong baroh ki tnad treikam hapoh jong ka South West Khasi Hills District, ha ryngkat ka Mawkyrwat Civil Hospital bad ka CHC Ranikor, ban bishar bniah ïa ka jingïatreilang bad ka jingpynkhreh ha ka por ba jia ki jingjia ba sngewsih. Kane ka Mock Exercise ka don ha ka ïa ka jingthmu ban pynkhlaiñ ïa ka jinglong ba la pynkhreh jong ki kynhun ba ïarap kyrkieh bad ban pynthikna ïa ki buit pynïaid ïa ki jingjia ba sngewsih ki ban sa pyntreikam ha ka rukom kaba dei.
Shuh shuh ki jaka pyntreikam na ka bynta kane ka Mock Exercise kaba yn sa pynlong hapoh Mawkyrwat District Headquarter kin kynthup ïa ka Mawkyrwat Presbyterian Secondary School, ka tnad treikam jong ka KHADC ha Mawkyrwat, ka ophis jong ka Water Resource, ka Shnong Laitlawsang, ka Ïew Mawkyrwat, ka ophis jong u Superintendent of Police ha Mawkyrwat, bad ka ophis jong ka tnad ka koit ka khiah ha Mini Secretariat. Na ka bynta ka Ranikor Civil Sub-Division & Ranikor C&RD Block, ka jaka treikam ba la buh kyrpang kan long ha Kensohsan.
Nalor kata, yn buh ruh ïa ka Staging Area bad ka Incident Command Post (ICP) ha phyllaw jong ka Mini Secretariat na ka bynta ka District Headquarter bad ha Ophis jong u Sub Divisional Officer (SDO) na ka bynta ka Ranikor Civil Sub-Division.
U Deputy Commissioner u la pyntip ruh ba kane ka Mock Exercise kan sdang ha ka por 9 baje mynstep jong ka 20 tarik u Lber, 2025 da kaba pynsawa ïa ka siren, kaba pyni ïa ka jingsdang jong ka jinglehkai. Namarkata, Ka bor synshar distrik jong ka South West Khasi Hills District ki kyntu ïa ki paidbah ba kim dei ban tieng haba ki ïohsngew ïa ka jingsawa, namar ba katei ka jinghikai kan kynthup ïa ki rukom pynkynriah, wad, bad pyllait im. Ha ka jaka kata, la pynshlur ïa ki briew ba kin wan ban peit bad ban ïoh jinghikai na katei ka jinglehkai, namar yn sa pyni paidbah kumno ban leh ïa kaba donkam ha ki jingjia ba kyrkieh ha ka jingim ba shisha kum ka jingkhynñiuh jumai bad kiwei kiwei ki jingjia ba sngewsih.
Halor kane ka Mock Exercise, ki bor synshar distrik ki kyrpad ïa ka jingïatreilang jong ki paidbah ban pynthikna ba kanne ka jinghikai kan long kaba ïaid beit ïaid ryntih ha ki liang baroh bad la kyntu ruh ïa ki paidbah ba kin ailad ïa ki kali kit nongpang, ki kali pynlip ding, bad ki nongpyntip kyrkieh ban pyndep ïa ki kam ha kane ka sngi khlem jingkhanglad.
Kane ka Mock Exercise ka long ruh kum ka sienjam kaba kongsan ha ka ban pynkhlaiñ ïa ki lad jingpynkhreh na ka bynta ki jingjia ba sngewsih bad ban pynthikna ba ki shnong ki thaw ki long kiba la pynkhreh bha ban pynïaid lada wan jia ki jingjia ba kyrkieh kum ka jingkhynñiuh jumai. Ki bor synshar distrik ki pynshlur ruh ïa baroh ba kin shim ïa kane ka kabu ban ïoh ïa lad jinghikai kiba kordor ha kaba ïa dei bad ka jingïarap bad ka jingpynkhreh lada wan jia ki jingshah lynshop ha ki bor jong ka mariang.