Yn phah tohkit ka KHADC halor ka jingplie karkhana ot dieng ki bar jylla ha Jirang

0

Shillong, Risaw 05: U Chief Executive Member jong ka Khasi Hills Autonomous District Council(KHADC) u Bah Titos Chyne u la ïathuh ba na ka liang jong ka KHADC kan sa thung ïa ka jingtohkit halor ka jingmih khubor ba ki don ki ki bar jylla kiba plie karkhana be-aiñ ban ot dieng ha ki thaiñ Jirang, Ribhoi District.
Haba kren bad ki lad pathai Khubor u la ïathuh ba na ka liang jong u u la khot ruh ïa ki Ophisar jong ka tnad Trade bad Enforcement ban bthah ïa ki ba kin pynlong ka jingtohkit halor kane ka jingkynnoh. U la ïathuh ruh ba ha ka jingshisha kat kum ka NoC kaba kiba la pan na ka KHADC ka dei na bynta ban plie ïa ki Furniture ym ïa ki karkhana ot dieng.
U la ong ba lada ka dei shisha ba ka don ka jingplie ïa ki karkhana ot dieng ka dei ka kamram jong ka sorkar ban leit khang ïa kine ki karkhana namar ka dei hapoh ka jingpeit jingkhmih jong ka.
Shuh shuh u la ong ruh ba ki NoC kiba la pan na bynta ban plie ïa ki Furniture ki dei beit ki Khasi kiba na ka liang u Rangbah Shnong ka Jirang ruh u la phah ka jingai jingmynjur(recomendation) halor ka jingpan NoC na ka KHADC.
U la ong ruh ba na ka liang ka KHADC kan tohkit halor ka jingpynkheiñ ïa ka aiñ The United Khasi-Jaintia Hills District(Trading By Non-Tribals) Regulation 1954 lada dei ba kine ki Furniture la pynïaid shisha da ki bar jylla ban hukum ruh ba ki dei ban pynbiang shuwa ka licence shuwa ban trei ïa kano kano ka kam.
Haba ïadei bad ka jingkynnoh ba kine ki karkhana ki ieng ruh ha ka kyrteng ki Khasi katba ka jinglong trai ka dei da kiba na Assam u Bah Titos u la ong ba lada ka don kaba kum kata ka jingleh Benami ka sorkar jylla ka dei ban pynshitom tyngeh ïa kiba donkti ha kata ka kam kat kum ki kyndon jong ka The Meghalaya(Benami Transactions Prohibitio) Act, 1980.

Leave A Reply

Your email address will not be published.