Ka jingrai kawei ka longïing kam dei ka rai u Paidbah: Pastor Shanlang Warjri

0

Ka Mairang Constituency ka dei ka Concstituency kaba ju sei ïa ki riewkhraw kum U Tirot Sing, Ka Phan Nonglait bad kiwei kiwei ki Riewkhraw ha kiba bun ki kam khamtam ban kyntiew ïa ka Jaidbynriew hynrei sngewsih ban ïohi ha kine ki khyndiat snem kiba la leit noh ka la hiar arsut ha ki liang baroh namar ka jingbymïoh shuh ïa ki Nongïalam ki ba shisha. Ka jingbym ïoh ïa ki Nongïalam ba shisha ka pynlong ïa ki nongshong shnong jong ka Constituency ban mad shibun ki jingeh, dei halor kane ka nongrim kaba la pynlong ïa nga u briew ba don jingkitkhlieh ban mih shakhmat ban ïakhun ïa ka MLA Election 2023 da ka mynsiem kaba rangbah khlem da ka jingpynbor mano mano.
Ka jingmih jong nga ban ïakhun ïa ka election ka long ban saindur thymmai ïa Synshar khadar, ban ai ka jingshakri kaba hok, ban long ka Sur na ka bynta ki rangli ki juki, ban long ka jingkyrmen ïa kiba la duh jingkyrmen, ban ïakhun pyrshah ïa ka jingñion beiñ ïa ki ba duk ba kyrduh, bad ïakhun pyrshah ïa ka jingpynlong kam khaïi ïa ka synshar ka khadar, ban ïakhun ïa ka bamsap bampong bad kumjuh ruh ban ïakhun pyrshah ïa ka Dynasty Politic lane ka jingbat ïa ka lakam synshar khadar tang da kawei ka longïing.
Ka jingailad ban bat ïa ka kam synshar khadar tang da kawei ka long longïing (Dynasty Politic) kan buh ka jingma bad jingmynsaw ïa ka Constituency bad ïa ka Jylla hi baroh kawei. Kum ki Paidbah ngim dei ban klet ba ka rai jong kawei ka longïing (Dynasty Politic) bad katto katne ki riewkhwan myntoi shimet kam dei ka rai jong U Paidbah. Kum ki Nongshong shnong ngi dei ban tip ba ngim lah ban ïoh ïa U Nongïalam ba shisha lada jied nongmihkhmat da kaba pynshongdor da ka bor ka Pisa hynrei dei tang lada ngi jied da ka lynti ka Hok bad Jingshisha. Ka jingstad bad ka jingshemphang ki nongthep vote ka Jylla kan wanrah ïa ka Synshar ka khadar kaba khuid ba suba, ka lawei ki khun ki kti jong phi.

Leave A Reply

Your email address will not be published.