Shillong, Risaw 04 : U Myntri ka tnad Community & Rural Development bad MLA ka Mylliem constituency, Bah Hamlet Dohling u la kob ba un thaw rekod kum u MLA ba nyngkong ban pynbiang bad ai ïa ka kaiphod treikam sha ki nongshong shnong kaba kum u nongmihkhmat u trei ha kine ki san snem kum u MLA.
“Nga la pynkhreh ban ai da ka kaiphod treikam kaba pura kiei ki kam kiba nga trei ha kine baroh san snem kum u MLA na ka bynta ka constituency,” u la ong da kaba bynrap ruh ba u lah ban dei u MLA ba nyngkong ban ai ïa ka kaiphod treikam sha ki paidbah.
Utei u nongmihkhmat haba kren ha ka jingïalang plie ïa ki saw tylli ki projek kam pynroi na bynta ka Lummawbah u la ong ruh ba shwa ban kut ka samoi treikam un phah sam sha baroh ki longiing ha ka constituency khnang ba kin ïoh ban bishar ïa ki kam kiba trei da kaba nujor bad kiwei pat ki MLA ba la dep.
“Lada ym ïoh ïa u MLA uba trei baroh ki skim kin sahkut lut ha ki tnad sorkar. Nga sngewkmen ba kum u nongmihkhmat nga la lah ban pynpoi skim ha baroh ki 36 tylli ki shnong kiba don ha ka constituency,” u la bynrap biang.
Nalorkata, u Bah Hamlet u la ong ruh ba ka daw kaba pynlong ïa u ban kwah sam ïa kitei ki kaiphod treikam ka long namar u ñiewkor ïa ka shi vote ba ki nongshong shnong ki ai bad pynjop ïa u. “Dei lyngba ka shi vote jongphi kaba pynïoh iing skul thymmai, ki surok rong, ki stadium bad bun kiwei kiwei. Dei na ka shi vote jongphi nga la lah ban mang haduh 3 klur tyngka na ka bynta ban shna skul kylleng kylleng bad ruh ïa ka stadium kaba 8 klur ha Lawsohtun nalor kiwei kiwei.”
U ong ruh ba ki paidbah nongthep vote ka Mylliem ki dei ki briew kiba stad bha namar ïa u briew u bym da lah ban trei bha ruh ki dang pynjop arsien lai sien kumta ïa uba trei bha lei lei katno tam.
