La pynngam um ïa ka blei Durga ha kylleng ki jaka ka jylla
ïaid beit ka jinglehniam Puja ki paid riewngeit Hindu

Shillong, Risaw 5: Hadien ka jingpynthut jongka khlam COVID-19 arsnem lynter ïa ki jingmane Blei naduh ki paid Khristan haduh ki paid Hindu, Niam Tre, Niam Khasi, Muslim bad ter ter, ha kaba ym shym la ïoh shuh ban pyndep ïa ki jingleh niam ha ka rukom kaba dei, mynta u snem baroh ki jait niam kynthup ïa ki paid riew ngeit Hindu ha Meghalya ki la ïoh ban leh kmen bad pyndep ïa kane ka leh niam Durga Puja ha ka rukom kaba ishongkun tad haduh mynta ka sngi ba la ïoh leit pynngam um ïa ka blei Durga. Mynta u snem kam shym don shuh kata ka jingbuh kyndon na ka liang jong ki bor sorkar ruh wat la kane ka khlam kam pat khuid lut ruh. Khamtam lei lei ba kam don kano kano ka jingpynthut ïa kane ka jinglehniam ba ka ïoh ban ïaid beit ïaid ryntih naduh ba sdang haduh ba kut.
Kane ka jinglehniam ka la sdang ha ka 01/10/2022 bad la pynkut mynta ka sngi ka 5/10/2022 da ka jingbret blei, ha ki jaka bapher bapher kiba la buh ryntih da ki bor synshar district ha ka kylleng ka jylla bad ha Shillong ka jingbret blei ka long ha Wahumkhrah ha kaba ki paid riewngeit Hindu kila ïa shim bynta shitrhem.
Ki bor pynïaid jong ki District kila buh ïa ki bor pahara ha baroh ki jaka bret blei ban peit ba kan nym don kano kano ka jingjia kaba sngewsih,ha nongbah Shillong ha ka jaka bret blei la ïohi ba la don ki magistrate, ki bor pulit bad ki dkhot ka Central Puja Committee ban peit ba kan ïaid beit ka jingbret blei.
Ha kine ki saw sngi jong ka jinglehniam Puja la ïohi ïa ka jingshongshit ha kaba ki riewngeit Hindu kila ïoh ban leit jngoh na kawei ka pandal sha kawei pat ka pandal ha ka por janmiet haduh por shiteng synnia, kala don ruh ïa ka jingïakob tem ksing bad ka jinglehniam kaba la ïaid beit haduh mynta sngi bala pyndep ïa baroh ki jinglehniam haduh ban da pyndep ïa ka jingbret blei.