Wer ka KJCLF sha ka jingduwai pyrshah Casino

0

Shillong, Risaw, 5: Ka Khasi Jaiñtia Church Leaders Forum (KJCLF) ka la khot bad wer ïa ki paidbah nongshong shnong ka nongbah Shillong ban ïashim bynta ha ka jingduwai kaba long kum shi bynta ban pyrshah ïa ka jingtei ïa ka Casino ha kane ka jylla Meghalaya.
“Ka KJCLF ka ïohi ïa ka jingsynjor jingmut jong ka Sorkar Jylla ha kaba ïadei bad kaba pynsangeh ïa ka ktem khalai Casino bad ka Meghalaya Regulation of Gaming Act 2021. Da kaba sngewthuh ïa ki jingbymman ki ban mih bad ka dor ba ka imlang sahlang kan siew da ka jingdon jong ki ktem khalai Casino bad kiwei ki jingsniew, ka Forum ka khot ïa ki nongïalam jong ki Balang, ki Seng bad ki Kynhun bapher ban ïakyrshan lang ïa kane ka jingdawa ban pynsangeh ïa kine ki ktem khalai Casino bad kiwei ki jingsniew,” ong u Secretary ka KJCLF u Rev. Edwin Kharkongor.
“Ban pynpaw ïa ka jingkhia jong kane ka kam, ka KJCLF kan pynlong ïa ka jingduwai kaba kyrpang na ka bynta ka jingmanbha bad baneh ha ka sngi Thohdieng ha ka por 11:00 baje mynstep ha KJP English Service Church, Police Bazar, Shillong. La khot sngewbha ïa baroh ki nongïalam Khristan ban ïashim bynta lang ha kane ka sngi,” la ong u kyrwoh.

Leave A Reply

Your email address will not be published.