Yn phah dorkhas ka Balang Catholic sha ka President ka Ri ban wanrah jingsuk ha Manipur

Shillong, Nailar, 03: Ka Catholic Association of Shillong (CAS) ha ka sngi Palei ka la khot bad wer ïa ki paidbah nongshong shnong jong ka nongbah Shillong bad kumjuh ruh ïa ki parabangeit jong ka Balang Catholic bad ïa ki parabangeit jong ki kynhun jait niam bapher bapher ban ïashim bynta lang ha ka Peace Rally na ka bynta ka jingsuk ha ka Jylla Manipur ka ban sa long ha ka 5 tarik mynta u bnai naduh ka por 10:00 baje mynstep ka ban sdang na madan Iewrynghep bad ban pynkut ha Don Bosco Mini Stadium, Laitumkhrah, Shillong.
U President ka Association u Bah J.A Lyngdoh ha ka jingïakren bad ki lad pathai khubor u la ïathuh ba ha kane ka sngi, yn sa pule ïa ka dorkhas ban sa phah sha ka President jong ka ri ka Droupadi Murmu lyngba u Lat ka Jylla Meghalaya u Phagu Chauhan ba kan tuklar lem halor ka jingïaumsnam bad ban wanrah biang ïa ka shongsuk shongsaiñ ha ka Jylla Manipur.
“Lai bnai kynthih ki sngi ki la ïaid naduh ba la jia ka jingïaumsnam ha ka jylla Manipur. Palat 50 hajar ngut ki briew ki la im khlem ing khlem sem, palat 10 hajar ki iing ki la shah pynjulor bad shah wiang ding. Palat 500 tylli ki jaka mane Blei ki la shah pynjot pynpra. Da ki spah ngut ki mynsiem briew ba luilui ki la duhei ïa la ka jong ka jingim na ka jingïaumsnam. Wat ïa kiba pang ba shitom, ki riewtymmen, ki khynnah bad ki kynthei ruh ym shym la map. Ïa ki kynthei la kam bad pynïaid lyngkhuit hakhmat u paidbhur,” la ong u President ka CAS.
“Ka jingïakynad jaidbynriew kam dei shuh ka jingjia kaba dang thymmai ha ka thaiñ Shatei Lammihngi hynrei ka jingïakynad kaba la jia naduh ka 3 tarik, Jymmang, 2023 ka la kham palat ban ïa ki jingjia kiba ladep,” u la ong.
“Ngi duwai ba ka jingsuk kan wanphai biang ha ka jylla Manipur. Ngi la lum ïa u synñiang ban phah sha ki lanot kiba sah ha ki ktem sah shipor,” la ong u President ka CAS.
“Haba jia kum kine ki jingïaumsnam ngim lah ban shu sngap jar bad ban shu long tang ki nongpeit kai. Ngi hap ban kren eiei ïa ka jingisih, ïa ka jingïashun niam, ka jingpynjulor bym don shuh ka mynsiem ïatip lem ïa ki ing ki sem bad ki mar ki mata bad ka jingthwet ban dkhat jubor ïa ki jingim briew,” ong u Bah JA Lyngdoh.
“Namarkata, ngi kyntu ïa ki kynhun bapher bapher ha ka jylla Manipur ba kin wan sha ka miej jingïakren ïasuk. Ai ba ki nongïalam kin sdang ïa ka jingïakren. Dei tang kane ka lad kaba ngi khmihlynti ban sdang thymmai biang sa shisien pat. Ngi donkam ïa ka jingsuk, ngi kwah ïa ka jingshongsuk shongsaiñ,” u la bynrap.
Ha kaba ïadei bad kane, ngi khot bad wer ïa ki nongshong shnong kiba ieid ïa ka shongsuk shongsaiñ ban ïasnohkti lang ha ka jingïaid rally ba jar jar na ka bynta ka jingsuk ha ka jylla Manipur, ong shuh shuh u Bah Lyngdoh.
“Ngin sa pynlong ka jingduwai kaba kyrpang ha kane ka sngi na ka bynta ka Jylla Manipur bad ngi la khot ruh ïa kiwei ki jait niam bapher bapher ban ïashim bynta lang ha kane ka sngi,” u la ong bad bynrap, “ngi kyrpad ïa ki nongïashim bynta ban kiar katba lah ban rah ïa ki jingthoh ha ki plakad bad ki banner ïa ki jingthoh kiba ai ding bad kiba kynshoit.”
Ka CAS ka la pyntip ruh ba ki nongïashim bynta ha ka rally ki lah ban pynieng ïa ki kali ha phyllaw ka St. Edmunds School, St. Edmund’s College, Monreau Institute of Integral Training, Holy Cross Father, Brookdene, Loreto Convent School, ha phyllaw ka Ingmane Cathedral bad ha madan phulbol, ha Christ King College, St. Anthony’s College, Shillong, ha phyllaw ka St. Marys School, ha phyllaw ka St. Margaret’s School.