Hap bahkhlieh lang ki kynhun niam, ki shnong ym dei tang ka Health Deptt ban ïoh tika ïada ki Khunlung
Naduh 7tarik yn sdang ka IMI 5.0
Shillong, Nailar 03 : Ka tnad ka Koit ka Khiah ka jylla shwa ba kan sdang ban ai tika na bynta kito ki khunlung ba hapoh san snem ki bym pat pyndep pura ïa ka tika, ka la ong ba kadei ka jingbahkhlieh lang naduh ki kynhun niam, ki shnong ki thaw, ki lad pathai khubor nalor ki tnad sorkar ym dei eh tang ka Health Department marwei.
“Donkam ka jingïatrei lang naduh ki kynhun niam, ki nongïalam shnong, ki lad pathai khubor, ki tnad sorkar kum ka tnad pule puthi, tnad pynroi nongkyndong bad ki lad pathai khubor ym dei eh tang ka tnad ka Koit ka Khiah,” ong u Mission Director ka NHM, u Ram Kumar haba kren ha ka jingïalang bad ki lad pathai khubor haba ïadei bad ka Intensified Mission Indranush 5.0 (imi 5.0).
U kubur ruh ba ka tnad ka kynduh bun ki jingeh ban pynkohnguh ïa ki kmie ki kpa ban wan ïalam ïa ki khunlung jong ki ban wan ai tika.
Shwa kane, na ka liang ka Dr. Valarie Laloo, Specialist Community Medicine incharge Immunization ka la ïathuh ba kane ka IMI 5.0 ka dei ban wad ïa ki khunlung ba dang kha haduh 5 snem ka rta kiba khlem pat ïoh tika lane kiba khlem pat dep ban ai tika pura kumjuh ruh ïa ki longkmie ba armet. Nalorkata la pynshai ruh ba kito kiba dep ban ai ïa ka tika kin sa ïoh ruh ïa ka syrnod.
La pynshai ruh ha kane ka IMI 5.0, yn rejistar ïa ki khunlung kiba khlem pat ïoh tika hapoh ka U-WIN bad sa ai tika ïa ki pat katkum ka por bad ka jaka ba la pynbeit.
Shuh shuh la pyntip ba katei ka jingai tika kan sdang naduh ka 7tarik – 12 tarik mynta u Nailar, nangta kan bteng biang pat naduh ka 11 – 16tarik Nailur katba ha ka sien kaba lai pat kan long naduh ka 9-14tarik u Risaw mynta u snem.
“Ka jingthmu jong kane ka tika ka long ban pyntikna ba ki khunlung kin ïoh ïa ka jingïada na ki jingpang ba shyrkhei bad kiba harukom,” ka la ong.
Na ka liang ka UNICEF, i Kong Georgina Lamare i la banjur ba donkam ban pyntikna na ki bor ba dei peit haba don kino kino ki khubor hamsaïa kiba ïadei bad ka jingai tika namar lada shu pynphriang kumto khlem pynshisha kan don ka jingktah kaba khraw.
“Dei ban da pynshisha na ki nongai ktien jong ka tnad kiba don naduh ki distrik haduh ha ka jylla ban pyntikna,” ka la bynrap biang.
Hadien kane la ïoh ruh ïa ka jingkren na u President ka Shillong Press Club, Bah David Laitphlang, Dr. Pradeep Halde naka JSI, bad ruh na i Kong Netta L Syiem, IECBCC Consultant NHM Meghalaya nalor kiwei kiwei.