Shillong, Nailar 22: U myntri rangbah ka jylla u Conrad K Sangma hadien ba u la wanphai na Mookaiaw u la hiar ban jurip ïa ka surok Shillong Jowai kaba la sniew ha baroh shilynter kane ka surok kaba la pyndik ïa ki paidbah nongleit nongwan.
Haba la ïohi da lade ïa ka jingsniew kane ka surok Shillong Jowai u mytnri rangbah ka jylla u la ong ba ka sorkar kan sa maramot ïa kane ka surok katba lah na ka sorkar bad ha ka juh ka por yn thoh sha ka sorkar pdeng ban pan pisa ban shna ïa kane ka surok.
U Myntri rangbah ka jylla u la ong ba kane ka surok kala sniew bha bad ka sorkar jylla kan ïaleh ban shna ïa kane katba lah haka juh ka por yn phah jingthoh sha ka sorkar pdeng ban maramot ïa kane ka surok namar ka dei ka national highway.
U Myntri rangbah ka jylla u la ong ba kane ka jingsniew ka surok kala long ruh na ka daw jong ka jingslap palat ha kine ki bnai kiba la dep, ka jinghiar jong u myntri rangbah ban jurip ïa kane ka surok ka long ban ïohi ïa ka jingsniew kane ka surok kaba pynïasoh ïa ka nongbah ka jylla ka sor Shillong bad ka Jaintia Hills bad shaduh Assam bad kiwei kiwei ki jylla ruh.
Lah ban kdew hangne ba ka surok na Shillong sha Jowai ka la sniew mynta la bun bun bnai ba kane ka jingsniew kala ktah shibun ïa ka leit ka wan ki paidbah, kiba la ud la ujor na ka por sha ka por. Hynrei na ka liang ka sorkar kala sngap man man bad khlem leh eiei, tad haduh kane ka jingkular u Conrad.
