Byrngem ban ïakhih ka FPWD lada ym khot ïakren u Conrad hapoh ka 5 tarik Nailur

Shilong, Nailar, 23: Ka Federation of Person With Disabilities (FPWD) kaba la long ka synjuk jong ki briew kiba duna dkhotmet ha ka Lah Sngi U Blei ka la kyrpad ïa u Myntri Rangbah ka Jylla u Conrad Kongkal Sangma ba u dei ban khot ïakren ïa ki nongïalam jong ka synjuk la kumno kumno ha lane shwa ka 5 tarik u bnai Nailur khnang ban ïakren ïa ki jingeh kaba kum ki birew kiba duna dkhotmet ki don ban pynsngew sha ki tyndong skhor jong ka Sorkar.
Ha ka jingïakren bad ki nongthoh khubor, u Chairman jong ka FPWD u Bah Ferdinand L.Marshyllong, u la ong naduh ka 4 tarik mynta u bnai ka FPWD ka ladep phah da ka jingthoh sha u Myntri Rangbah na ka bynta ban ïoh ïakynduh ïa u hynrei haduh mynta na ka liang jong ka ophis jong u Myntri Rangbah kam shym pat ai ktien eiei haduh kine ki sngi.
“Lada u Myntri Rangbah um khot ïakren satia ha lane shwa ka 5 tarik u Nailur, 2022, ka synjuk kam banse ban pynlong da ka jingïakhih,” la ong une u nongïalam jong ka FPWD.
U President jong ka Khasi Disabilities Association (KDA) u Bah Starwin Kharjana haba bynrap halor kane, u la ïathuh ba ki mat kiba ka Federation ka kwah ban pynsngew sha ki tyndong skhor jong ka Sorkar Meghalaya Democratic Alliance (MDA) ki long halor ki briew kiba duna dkhotmet kiba la aplai ïa ka Chief Minister’s Social Assistance (CMSA) naduh u snem 2020 na ka ophis Child Development Project Officer (CDPO) hynrei kim shym la ïoh satia mynta la ar snem kynthih.
“Ngi kwah ruh ban pynsngew hakhmat u Myntri Rangbah ban mynjur ïa ki kyrteng ba thymmai jong ki briew kiba duna dkhotmet kiba la aplai ïa ka skhim CMSA bad ban mang pisa na ka bynta ka baibam namarba ka dei tang kane ka lad kaba ki im jakpoh,’ u la ong.
U la ïathuh ruh ba kaba kham sngewsih ka long ba ka Sorkar ka la bthah ruh ba ki briew kiba duna dkhotmet kin ym lah shuh ban ïoh pdiang ïa ka song jingïarap na ka Chief Minister’s Social Assistance (CMSA) kaba T.500 shi bnai lada ki la ïoh ïa ka Unemployment Allowance kaba T.1000 shi bnai bad kiba ïoh jingïarap na ka Unemployment Allowance kim lah shuh ban ïoh ïa ka jingïarap na ka Chief Minister’s Social Assistance (CMSA).
“Ïa kane ngi ladep thoh ruh wat ïa u Myntri ka tnat Social Welfare ka Sorkar Jylla bad ngi la phah kopi ruh sha u Director jong ka Social Welfare bad ha ka Commissioner for Persons with Disabilities ba kin buddien halor kane kam,” la ong u Bah Kharjana.
Ha kajuh ka por u la ong ba ka seng ka la thoh ruh sha u Myntri Rangbah ka Jylla ha kaba ïadei bad ka jingdawa ban pynjlan ïa ka rta thungkam ïa ki briew kiba don jingduna ha ki dkhotmet, kata, na ka 42 snem sha ka 47 snem haba ki aplai kam ha ki tnat treikam jong ka Sorkar Jylla.