Shillong, Nailar 08 : Ka BJP Meghalaya ha ka sngi Nyngkong ka la kam ba ki don katto katne ngut ki MLA na kiwei pat ki party kiba kwah ban ïakhun noh na ka party ha ka elekshon MLA kaban long ha u 2023.
Haba kren bad ki lad pathi khubor, u National Executive Member ka BJP ba dei ruh u MLA ka BJP na Pynthorumkhrah Bah AL Hek u la kubur ruh ba dang shen arngut ki MLA ba kynthup ïa u MLA ka TMC na Mawsynram Bah HM Shangpliang bad ruh u MLA ka Shillong West, Bah Mohendro Rapsang ki la pynpaw ba ki kwah ban ïakhun na ka BJP ha kane ka elekshon ban wan.
“Ngi la don ka jingïakren bad nga la kren hi dalade ba kin wan ban pynïasoh sha ka BJP tangba mynta kam pat poi sha ka bynta ba khatduh hynrei ka dang don ha ka jingkren,” ong u Bah Hek.
Shuh shuh u ong ruh ba ha ka jingïakren hi ka paw ba kitei ki MLA ki la noh sha ka BJP. “Tangba namar kam pat dei ka jingïakren kaba khatduh ngam pat nud ban ong ei ei,” u la ong.
Nalorkata, u Bah Hek u la kam ruh ba ki dang don sa kiwei ru ki MLA bad ruh ki MLA barim kiba ka jingïakren ka dang ïaid mynta. Na ka jingïathuh jong u, ka BJP ka buh thong ban pynieng kyrtong la kumno kumno 30 haduh 40 tylli ki constituency ha kane ka elekshon ban wan.
