Yn leit aireng ki nongïalehkai Athletics ka Jylla sha National JuniorAthletics Championship ha Odisha

Shillong, Risaw 22 : Ki nongïalehkai Athletics ka Jylla hapoh ka lama jong ka Meghalaya Atheltics Association kin leit ban aireng ha ka lympung ïalehkai jong ka 39th National Junior Athletics Championship 2024, kaban long ha Bhubaneshwar, Odisha naduh ka 25 – 29 tarik Risaw mynta u snem.
Kane ka kynhun kaba mih na ka jylla hynne ka sngi ka kynthup ïa u Rikangku D Sangma ha ka thup U-14 ki shynrang uban aireng ha ka Kids Javelin bad ha ka Triathlon B.
Nangta ka Rukini RT Dkhar ha ka U-16 ki kynthei ban aireng ha ka 600M.
Ka Anisha Klein kaban aireng ha ka thup U-20 jong ki kynthei kan aireng ha ka High Jump, katba u Donbok Shabong ban aireng ha ka thup U-20 jong ki shynrang un aireng ha ka 400m.
Ïa kane ka kynhun yn ïalam da u Bah Plesantly Synnah ba dei ruh u Athletic Coach, Department of Sports and Youth Affairs.
Ha ka lympung ïalehkai ba dang shu dep jon gka 35th East Zone Junior National Athletics Championship 2024, u Rikanku D Sangma u la ïoh ban khur ïa ka takma rupa ha ka Kids Javelin bad wan ba saw pat ha ka Triathlon B.
Kumta na ka liang ka Synjuk ka phah ka jingkitbok ïa une u heprit ba un lah ban ïalehkai bha bad wanrah ïa ka nam bad ka burom ha kane ka National Junior Championship.
Ha kajuh ka por ka Anisha Klein ka la ïoh ban khur takma rupa ha ka High Jump, u Donbok pat u la ïoh ban khur takma ksiar ha ka 4 X 400M Mixed relay katba ka Rukini RT Dkhar ka lawan ha ka kyrdan kaba saw.
Lah ruh ban kdew hangne ba dei tang kito ki nongïalehkai kiba la lah ban pyndep ïa ka Entry Standard jong ka Athletics Federation of India ba kin lah ban aireng ha katei ka 39th National Junior Championship.