Yn khot ïakren biang ïa ka HPC halor ka jingpynkynriah ïa ki 342 ïing na Them Ïew Mawlong

0

Shillong, Ïaiong 21 : Ka sorkar jylla ka la rai ban khot ïa kren ïa ka Harijan Panchayat Committee (HPC) ban ïa kren biang halor ka jingtyrwa ban pynkynriah noh ïa ki 342 tylli ki longïing na Them Ïewmawlong sha ka jaka jong ka Shillong Municipal Board ba la pynkhreh da ka sorkar.
Kane ka rai ba shim ka sorkar kadei hadien shisngi ba ka HPC ka la phah ïa ka jubab haba ïadei bad ka blueprint jong ka sorkar jylla da kaba kynnoh ba katei ka jingtyrwa na ka sorkar kadei ka bym pat pura bad ka bym ïahap haei haei ruh.
La don ruh ka jingïalang ba la khot da u Symbud Myntri Rangbah ka jylla ba dei peit ïa ka tnad Kampohïing, Bah Prestone Tynsong ha ryngkat ka jingdonlang u Symbud Myntri Rangbah ba dei peit ïa ka Urban Affairs, Bah Sniawbhalang Dhar kumjuh ki heh sorkar ha kane ka sngi Thohdieng ban ïakren halor katei ka ishu.
“Nyngkong eh, ngi hap ban ïa bishar bniah ïa ka jubab ba la phah da ka HPC bad ban peit kaaei kaba ki la kdew bad halor kata, ngin sa kynduh biang,” ong u Bah Sniawbhalang haba kren bad ki lad pathai khubor. Katkum ka jingong jong u, ka sorkar kan sa khot ïa kren ruh ïa ki HPC ban ïa kren halor katei ka mat ha ka taïew ban wan.
U la ïathuh ruh ba ka jingïalang ba la khot da u Bah Prestone ba dei ruh u Chairman ka High Level Committee ka la ïakren ruh kumno ban ïaid shakhmat ïa ka kam.
Haba kren pat halor ka rai jong ka HPC ban ïai neh bad ki mat jingdawa ba nyngkong, u Bah Sniawbhalang u la ong, “Ki la don ïa ka hok ban dawa ïa kaei kaba ki kwah bad kum ka sorkar ngin sa bishar bniah la ka long ne kam long. Kane kadei ka daw ba ka jingïakren bad ka jingïasyllok ka dang ïaid shakhmat mynta.”
Shuh shuh u ong ruh ba kin sa peit hadien ba la dep ban ïa kren ba kaei pat kaba kin leh hadien. U la kam ruh ba ka jingïakren ka dang ïaid shaid shaid mynta bad ka HPC. “Kyrmen skhem ba kan mih ka jingïakren kaba seisoh khnang ba ka kam kan kut da kaba suk. Ngi ruh ngi kwah ia ki ba kin treilang bad ka sorkar,” u la bynrap shuh shuh.

Leave A Reply

Your email address will not be published.