Ngi pan mar 200 meter sawdong na ka bynta 342 ki longïing ki tyrwa pynban tang da ka ïing 7 mala: Gurjit Singh

Shillong, Ïaïong 21: U Secretary ka Harijan Panchayat Committee (HPC) u Gurjit Singh u la pynpaw ba ka jingbym pdiang jong ka HPC ïa ka Blue Print kaba ka sorkar ka la tyrwa na bynta ban pynkynriah ïa ki ka dei namar ym don kawei ruh na ki 8 tylli ki kyndon kiba ka buh ha khmat ka sorkar ba kan pynurlong.
Haba ïakren bad u Mawphor u Gurjit Singh u la ong ba na ka liang jong ki ki la tyrwa ha ka sorkar 8 tylli ki kyndon ba kynhtup ïa kine lai tylli kiba ha khmat eh kata ba lada pynkynriah na katei ka jaka ka dei ban ai bujli ïa baroh 342 tylli ki long ïing da ka jaka kaba thymmai ba 200 SQ Meter bad ka jaka ka dei ruh ban dei beit ha European Ward bad kumjuh ba ka sorkar ka dei ban bei tyngka na bynta ïa man kawei pa kawei ka long ïing ba kin ïoh tei ïing thymmai.
“Ka sorkar ka tyrwa beit ha ka Blue Print ba kan tei ïa ka ïing ba 7 mala na bynta jong ngi baroh bad kane ka jingtyrwa ka sorkar ka long markhongpong beit ïa kaba ngi tyrwa sha ka sorkar, haba ka sorkar kam pdiang satia wat kawei ruh ka kyndon ba ngi tyrwa kumno ngin shu pdiang ma ngi ïa kaba ka tyrwa ka sorkar pat,” ong u Gurjit Singh.
Haba kylli la kane ka jingbuh kyndon ka HPC haduh 8 tylli ka pynlong ba ka sorkar kan ym lah pynurlong shuh, “Ngim pat nang ban ong eiei ïa kane namar dei tad ynda la poi ha ka meij ïakren bad ka sorkar ngin sa sngewthuh ïa ka jingeh kaba ka ïa kynduh bad ngi ngeit ba ka sorkar ruh kan sngewthuh ïa ka jingeh kaba ngi ruh ngin ïa kynduh lada kam pdiang ïa kaba ngi tyrwa, namarkata, donkam ba ka sorkar ruh kan sngewthuh ïa kaba ngi ruh ngi ïa kynduh jingeh,” u la jubab.
Shuh shuh haba pynksan ïa ka nongrim ba ki ïeng u Gurjit u la ong, “Namar ïa kane ka jaka ka Hima Mylleim ka la ai sha ngi bad lada ka sorkar ka pynkynriah noh ka dei ban ai bujli da kawei pat ka jaka kaba ïaryngkat dor bad kane kaba ngi la shong da ki spah snem.”
Haba kylli pat la ka jingbuh kyndon jong ki ba ka sorkar ka dei ban bei tyngka ban tei ïing thymmai lada pynkynriah kam dei ka kyndon kaba jwat bad kaba la palat pud, u Gurjit u la ong, “Lada pynkynriah ïa ngi na ka jaka kaba ngi la tei la ka ïing ka sem kumno yn shu ai thik tang ka jaka donkam ban bei tyngka ruh ba ngin ïoh tei ïing thymmai biang da kawei”.
Shuh shuh u la ong ba na ka liang ka HPC bad baroh kiba shong ha katei ka jaka ki kwah ba ka sorkar ka dei ban pyni da ki kam ïa ki jingtyrwa kaba ki la buh ha khmat jong ka ym ban shu kren tang da ka ktien namar kane kan ym poi shano shano hynrei kane ka mat kan shuh bteng ban sah pongding na kawei ka snem sha kawei pat bad ma ki kiba sah ha kane ka jaka kin hap ban mad ïa ka saja na ka jingpyrkhing kyndon ka sorkar ban ym shah ïaid kali shuh kaba ktah pat ïa ka kamai kajih jong kiba buh dukan ha kane ka jaka.
Haba kynthoh ïa ka jingkam u Symbud Myntri Rangbah ka Jylla u Bah Prestone Tynsong bad kumjuh u Bah Sñiawbhalang Dhar ba ha une u bnai Ïaïong mynta hi u snem ka sorkar kan pyndep noh ïa ka jingpynkynriah ïa ki ‘katba ha ka jingshisha na ka liang ka sorkar kam pat shym la lah wat tang shim ïa ka rai ne finalised ïa ka Blue Print’ u la ong.
Shuh shuh u la ong ba ka Kashari ruh ka dang bteng ban shim bishar ïa kane bad ka mokotduma kaba ki la ujor ruh ka dang sahteng, u la ong ba ban weng ïa kane ka jingeh ka dei beit tang lada ka don ka jingïasngewthuh jingmut hapdeng jong ka sorkar bad ka HPC lymda kumta u ong kane kan nym poi shano shano ruh.
Haba la kylli la ka dei pynban tang ka jingkam ban ïoh myntoi saiñ pyrthei halor ka jingïai kam ka sorkar na ka por sha ka por ba ka jingpynkynriah kan urlong noh ha ka por ba ka la buh, u Gurjit Singh u la ong ba lada peit na kaba long mynta ka dei shisha ba ka sorkar ka pyrshang ban pyndonkam ïa kane ka mat na bynta ka jingmyntoi saiñ pyrthei jong ka.