New Delhi, Ïaïong 22 : Kadei shisha ka jingïalehkai kaba pynkmen bad kaba ai mynsiem na ka bynta ki samla ïalehkai dang samla jong ka Inspire Institute of Sport (IIS) kiba ïashim bynta ha ka U17 Cadet National Wrestling Championships bad ha ka Senior Open National Ranking Championship kaba la pynlong ha Uttar Pradesh. Kitei ki samla ïalehkai ka IIS ki la khur phra tylli ki takma.
Ha ka U17 Cadet Championship, ki nongïalehkai ïalympat wrestling ki la khur ar tylli ki takma Ksiar bad saw tylli ki takma Rnong. Ka Shweta Sanju Annikeri (49 kg), kaba dei jong ka IIS bad kaba shong ba sah ha Karnataka, ka la ïoh ban khur ïa ka takma Ksiar ha katei ka kyrdan ïakob. Kadei ruh ka sien kaba lai na ka bynta jong ka ban khur takma ha ka National Championship hadien ba ka la jop takma Rnong ha ka Cadet National Championship 2022 bad takma Rnong ha ka Sub-Junior National Wrestling Championship 2021. Ha ka kyrdan ïalehkai jong ki khynnah kynthei, ka takma kaba ar kadei ka takma Rnong ba la jop da ka Liza Tomar ha ka kyrdan ïakhun ba 61kg.
Katba ha ka liang ki shynrang, ïa ka takma Ksiar la jop da u Sonu Hooda uba ïakhun ha ka kyrdan ba 60kg. Ki lai tylli ki takma Rnong la jop da u Harshvardhan Bhoyar (65kg), Mohammed Shazad (71kg) bad u Ashvani Yadav (71kg).
Ïa ka Senior Open National Ranking Championship ruh la pynlong ha kajuh ka jaka ha kaba ar tylli ki takma Rupa ki la leit sha ki thei ïalehkai wrestling jong ka IIS, ka Pushpa Yadav (53kg) bad ka Harshita (72kg).
Haba ai jingkren halor ki rukom ïalehkai ki khynnah kynthei, u Yandro Quintana, u nongïalehkai Olympic barim ba khur takma Ksiar bad head coach jong ka kynhun ïalehkai wrestling jong ki kynthei ka IIS u la ong, “Ka India ka la khlaiñ ba baroh ki liang ha ki jingïalehkai sport, bad ka jingïalehkai wrestling kadei kawei kaba la kham pynleit jingmut bha ha kane ka thaiñ. Ka shimpor na bynta jong ngi ban kiew shaphrang, bad mynta ngi don ki nongïalehkai kiba khlaiñ kiba la pynkhreh ban pyni ki sap ïalehkai ha ki jingïalehkai kiba hapoh la ka jong ka jylla bad mynta u snem ki jingïalehkai International kin dang kham lah ban pynjanai.”
“Nga dap da ka jingsngewkmen ïa ka rukom ïalehkai jong ki khynnah kynthei kiba la pyni shisha ki sap ïalehkai kiba tbit bad mynta ngi khmih lynti ba lyngba kane ka lympung ngin dang kham lah ban dang ïalehkai bha shuh shuh,” la ong u Quintana.
