Shillong, ïaïong, 21: Hadien ba ka Ïing Bishar jong ka Meghalaya High Court (HC) ha ka 5 tarik u Nohprah jong u snem 2022 ka la la pyndam noh ïa ka hukum ba la pynmih da ka sorkar jylla ha ka 23 tarik Lber 2021 bad kumjuh ki kyndon ka Meghalaya State Education Policy 2018 kaba khang ïa ki nonghikai kolej kiba hikai ha ki Aided Institution ne ki kolej kiba ïoh jingïarap na ka sorkar ba kin ïakhun ïa ka ilekshon ne ban shim bynta ne kitkam ha ki seng saiñ pyrthei, na ka liang ka sorkar jylla ha ka 2 tarik Rymphang 2023 ka la ujor mokotduma ban phah bishar biang ïa kane ka rai ka HC.
Ka sorkar ha ka jingphah bishar biang ïa kane ka rai kaba la pynmih da u Justice HS Thangkhiew ha kaba ïadei bad ka jingpynksan jong ka HC haba shim bishar ïa ka mokotduma ba la ujor da u bah Brightstarwell Marbaniang ha ka mokotduma ba la tip kum Shri Brightstarwell Marbaniang & Ors Vs State of Meghalaya kaba pynksan ïa ki nonghikai kolej kiba dei ha ka kyrdan Aided ki lah ban shim bynta ha ka kam saiñ hima sima, ka sorkar ka la ujor halor ka jingpyndam ka HC ïa ka Clause 7.4.3 ka Meghalaya Education Policy 2018 bad ka hukum (notification) kaba ka pynmih ha ka 23 Lber 2021 ba la pynkylla ïa ka Aided College Employee Rule kaba ong ba “Ki nonghikai ha ki kolej sorkar ne ki skulbah sorkar ne ki kolej ne skulbah kiba ïoh jingkyrshan pisa na ka sorkar la khang ba ki don bynta ha kino kino ki kam saiñ hima sima namar ki hap hapoh ka thup ka kam bam ar malaoi ne Office of Profit”.
Hadien kane ka jingujor ka sorkar, ka High Court la shim bishar ïa kane ka mokotduma da arngut ki Nongbishar ba kynthup ïa u Chief Justice u Justice Sanjib Banarjee bad u Justice W Diengdoh ïa ka mokotduma ba la jer kyrteng State of Meghalaya vs Shri Brightstarwell Marbaniang & Ors hynrei ha ka sien shong bishar ha ka sngi Thohdieng na ka daw ba ka don ka jingthut noh ka audio jong u Nongsaid aiñ ka sorkar uba la ïasaid online ne virtually na ka liang ka HC ka la pynjlan noh ïa ka jingshim bishar ha kawei pat ka por kata ha ka 28 tarik Ïaïong 2023.
Lah ban kdew hangne ba u Bah Brightstarwell Marbaniang uba la shah jied kum u MLA ka Mawlai ha ryngkat kiwei pat ki nonghikai ki la ïoh ka jingpynksan ïa ka jingujor mokotduma ban pyndam ïa ka jingpynkylla ka sorkar ïa ka Clause 7.4.3 ka Meghalaya Education Policy 2018 bad ka hukum (notification) kaba ka pynmih ha ka 23 Lber 2021 ba la pynkylla ïa ka Aided College Employee Rule kaba khang ïa ki nonghikai ban shim bynta ha ka saiñ hima ha kaba ka Ïing Bishar ha ka hukum ba ka pynmih ha ka 5 tarik Nohprah 2022 ka la ong ïa kane ka jingpynkylla ka sorkar ba “ka long ka rai lymmuh”.
Haba u Mawphor u la ïakren bad u Bah Brightstarwell Marbaniang u la ong ba na ka liang jong u u sngew skem ba ka kashari kan pynksan beit ïa ka rai kaba ka la shim ha ka mokotduma ba ki la ujor.
“Ngi sngew skhem ban ka HC kan ïai pynksan ïa kane namar ki aiñ bad ki kynon ki la don lupa ha ka liang jong ngi hynrei la jar katta ngi hap ap kumno ka HC kan rai,” u la ong.
