Ki bar jylla kiba treikam ha u pud u sam ka KHADC ki dei ban ïoh Trading License: TW Chyne
Shillong, ïaïong, 21: U Chief Executive Member (CEM) jong ka Khasi Hills Autonomous District Council (KHADC) u Bah Titosstarwell Chyne u la kren da kaba shai ba kino kino ki bar jylla kiba trei ha kino kino ki kam hapoh u pud u sam jong ka KHADC ki dei ban da ïoh ïa ka Trading License.
“Ki bar jylla kiba leh ïa ki kam khaii ki dei ban da bud thik pa thik ïa ki rul hapoh ka The United Khasi-Jaiñtia Hills District (Trading by Non-Tribals) Regulation, 1954,” ong u Chyne ha ka jingïakren bad ki lad pathai khubor ha ka sngi Thohdieng.
Ha kaba ïadei bad ka jingleit jurip da ka KHADC ha ka sngi Palei ha Iewduh, u Bah Chyne u la ong ba ka long kaba donkam ban da pynshisha ïa ka jinglong nong India jong ki bar jylla bad ïa ki kam ba ki trei.
U la ong ba ka District Council kan pynthikna ba kito ki bar jylla ki bym don ïa ka Trading License kin ym lah daleilei ruh em ban leh ïa ki kam khaii hapoh u pud u sam jong ka Council.
“Ki dei ban don ïa ka EPIC, bad kiwei kiwei ki kot ki sla kiba donkam kum ka No Objection Certificate (NoC) na u Rangbah Shnong lada ki leh ïa ki kam khaii ha ki shnong ki thaw bad na ki Syiem lada ki leh ïa ki kam khaii ha Iewduh,” la bynrap u Bah Chyne.
Katkum ka jingong jong u CEM ka KHADC, bun na ki nongdie madan ki don ïa ka Trading License bad kaba ki dei ruh ban pynthymmai na ka por sha ka por bad ong shuh shuh ba lada kim don ïa ka Trading License ka Council kan khang tala beit ïa ki dukan jong ki.
Halor ka building ba la long trai da u Paul Leong, u CEM ka KHADC u la ong ba kane ka dukan ka dang hap hapoh ka jingpeit jingkhmih jong ka KHADC. “U trai u don ka hok ban ai wai sha ki bym dei ki Khasi tangba ki dei ban da bud ryntih ïa ki aiñ katkum ka The United Khasi-Jaiñtia Hills District (Trading by Non-Tribals) Regulation, 1954,” u la ong.
U la ïathuh ruh ba u la ïoh pdiang ïa ka shithi na ka Meghalaya Greater Shillong Progressive Hawkers and Street Vendors Association kaba pyrshah ïa ka jingkhynra ïa ki nongdie madan.
Haba pynshai halor kane, u Bah Chyne u la ong, “ngim shym la leit hangtei ban kyndang ïa ki nongdie madan hynrei ngi pyrshah tang ïa ki bym don ïa ka Trading License. Ïano kane ka kynhun ka kwah ban ai jingïada, ïa ki briew lajong ne ïa ki bar jylla. Nga kwah ban buh ïa kiwei kane ka jingkylli. Ki dei ban sngewthuh ba ngin ym ailad ban leh ïa kino kino ki kam khaii lada ki briew hi kim don ïa ka Trading License.”