Shillong, ïaïong, 22: Ka ophis jong ka Sub-Divisional Officer Pynursla Sub Division ha ka Sngi Saitjaiñ ka la pynbna paidbah ba ka surok National Highway-40 Shillong-Dawki yn ailad ban ïaid lynti tang haduh ka por 8:00 baje mynmiet jong ka 22 tarik u bnai Ïaiong, 2023. Ki kali kiba kit jingkit kim dei ban kit palat ïa ka jingkhia kaba 30 ton shaneng.
Ka Sub-Divisional Officer ka la pyntip ba hadien ka 8:00 baje mynmiet ha kane kajuh ka sngi yn khang shwa ïa ka surok khnang ban ïoh pynkhuid ïa ki maw bad ïa ka khyndew kiba sahkut hapdeng surok bad kaba la pynthud ïa ka leit ka wan jong ki paidbah ka thaiñ Riwar Mihngi.
Kum ban shu pynkynmaw hangne, ha ka janmiet 14 tarik mynta u bnai ka khyndew bad ki maw kiba heh ki la twa hapdeng surok Shillong-Dawki ha riat Rngaiñ ha kaba arngut ki rangbah briew, kata, u Bah Seiborlang Jaktung uba la 42 snem ka rta bad uba long ruh u Rangbah Shnong jong ka shnong Wahlyngkhat bad u paralok jong u, u Bah K. Khongjirem na ka shnong Wahkhen ki la duhei ïa la la jong ka jingim ha kane ka jingjia.
