Shillong, ïaïong, 22: Watla ka dei ka longkmie kaba la don arngut ki khun hynrei kum ka kmie wat hapdeng ka jingbun kam pynban ka Sangita Marak ka la ïakhun tyngeh tad haduh ban da ïoh phong ïa ka pansngiat Mrs Vogue Star 2023 ha ka rynsan ïakop thei bhabriew hapdeng ki longkmie kaba la long ha nongbah Jaipur naduh ka 14 tarik haduh ka 16 tarik u Ïaiong, 2023..
Ha ka jingïakren bad ki lad pathai khubor ha ka Sngi Saitjaiñ ka Sangita Marak kaba shong basah ha nongbah Shillong ka la ïathuh hadien ba ka la jop ïa ka Audition ba la pynlong Online hadien kata ka la shah jied ban ïoh jinghikai ha ka Vogue ha nongbah Jaipur ban mihkhmat ïa ka jylla Meghalaya na ka bynta ban ïashim bynta ha ka Mrs Vogue Star 2023.
Kum ban shu pyntip hangne, ka Sangita Marak ka la long ka lahduh ha kane ka rynsan ïakop napdeng ki 500 ngut ki longkmie kiba la ïashim bynta na kylleng ka ri India.
Ha kane rynsan ïakop thei bhabriew, ki don ar tylli ki rynsan ïakhun kiba kynthup ïa ka Ms. bad Mrs. Vogue Star 2023.
“Nga sngewkmen ban ïoh mihkhmat ïa ka jylla bad ban jop ïa ka pansngiat Mrs Vogue Star 2023 bad ngan ïai bteng ban ïakhun ha kiwei ruh ki rynsan khnang ban pynshlur ïa kiwei pat ki para kynthei kiba la shim ïa ka kyrdan longkmie ba kin dup pynurlong ïa ka jingangnud kaba ki don,” ong ka Sangita Marak.
