Dang jurip ïa ki jaka ban phah pahara da ki CAPF ban khanglad ïa ki kam tih bad khaïi dewiong beaiñ

Shillong, Iaiong 22: U Justice (Retd) B.P Katakey uba khlieh ïa ka Committee ban peitngor ïa ki kam beaiñ haba ïadei bad u dewiong, ula ïathuh ba ka Committee ka dang pynkhreh ban ithuh ïa ki katto katne ki jaka hapoh ka jylla ban phah pahara da ki Pulit Central Armed Police Force (CAPF).
U Justice B.P Katakey ula ïathuh ba dang shen ka Meghalaya High Court kala pynmih ïa ka hukum haba ïadei bad ka jingbthah ka sorkar pdeng ban phah 10 pyrton ki Pulit CAPF na ka bynta ban peitngor ïa ki kam beaiñ haba ïadei bad u dewiong.
Ula ïathuh ba ka High Court ka la bthah ruh ban thung ïa uwei Pulit na ka Meghalaya Police Service (MPS) bad halor kane ka Committee ka dang ïakren bad ka tnat kam pohïing na ka bynta kane ka kam.
Ula ïathuh ruh ba hadien bala dep ban thung briew bad hadien bala ithuh ïa ki jaka, kum u khliehduh ka Committee un sa ïakren bad ki Commandant na ka bynta ban pynïeng ïa ki Pulit CAPF bad lada don kaei kaei, un hap bthah ïa ki Pulit ban pyntip shaka Committee.
Nalor kane u Justice B.P Katakey ula ïathuh ba dalade ruh u la ïohi ïa ka jingshalan beaiñ ïa u dewiong khamtam haba ïadei bad ka jingjia kylla ka Trok kit Dewiong haka 4 tarik mynta u bnai . U ïathuh ba ula buh jingkylli ïa ka sorkar ba balei ka jingshalan beaiñ ïa u dewïong ka dang bteng khlem jingduna.
Ula ïathuh ba naka liang ka sorkar jylla ruh mar mar kala thung da u Pulit ophisar MPS jong ka kyrdan DSP ban pynlong ka jingtohkit, ha kaba la dep ban ai ïa ka kaiphod jong ka jingtohkit kaba sdang, bad mynta dang ap ïa ka kaiphod jong ka jingtohkit kaba khatduh.