Shillong, Iaiong 22 : Da ka jingtrei shitom jongki pulit ka South West Garo Hills, ha ka miet Sngi Thohdieng ki la ïoh ban kem ïa u briew uba donkti ha kaba khaïi beaiñ ïa ki kuli drok (psychotropic) sha baroh ka ri lum Garo.
Ki pulit ki la ïoh kem ïa une u briew na Mirjumla, Monabari South West Garo Hills bad u dei uba kyrteng u Chakeawat Hussain.
Hadien ba ki pulit ki la ïoh jingtip kaba thikna bha shaphang une u briew ki la pynlong ka jingbud dien bad haba la ïoh jingtip ba u don ha ka thaiñ Mir Jumla, Monabari, ki pulit ki la leit sha katei ka jaka bad ïoh ban kem ïa u. Une u briew u dei na Mankachar, South Salmara Assam.
Na ka met jongu ki pulit ki la ïoh ban kurup 689 tylli ki kuli capsule SPSHEN, 113 tylli ki kuli Nitracel, kawei ka smartphone bad ka pisa 5000 tyngka.
La ïathuh ba une u briew u la pyndonkam ïa ka dukan die mar bam jongu kum ka jaka ban buhrieh bad pynïaid ïew ïa kitei ki kuli drok. Hadien ba la kem ki pulit ki la khang tala ruh ïa katei ka dukan. Ki pulit kil a register case pyrshah ïa u ha Ampati Police Station kat kum ka Case No 19(04)2023 U/s 22(b)/25 NDPS Act bad ka jingtohkit ïa u ka dang ïaid shakhmat.
