Shillong, Iaiong 22 : Ka Federation of All School Teachers of Meghalaya (FASTOM) ka la kyntu ïa u Myntri ka tnad pule puthi u Rakkam A Sangma ba un kyntiew kyrdan noh ïa ki Nonghikai Adhoc kum ki Nonghikai Deficit.
Kat kumka jingpyllait khubor mynta ka sngi u President ka FASTOM u bah Diningroy Marwein u la pyntip ba ïa ka jingthoh halor kane ka kam la dep ai sha u myntri ba un leh ïa kaba donkam.
U la ïathuh ba ka Federation ka la dawa ba ki ïa ki nonghikai naduh ki Lower Primary shaduh ki Higher Secondary Scholl dei ban kyntiew kyrdan noh kum ki Nonghikai Deficit.
U bah Marwein u la ïathuh ruh ba ki la pynkynmaw ïa u myntri halor ki jingdawa jong ki kiba dang sahteng kata kum ka jingkyntiew ïa ka tulop jongki 5 % man la u snem bad ba ka rta shongthait naka 60 snem sha ka 65 snem.
Ha katei ka jingïakynduh bad u Myntri u bah Marwein u la ïathuh ba u la kular ban thaw lad ban pyndep ïa kine ki jingdawa ba sahteng jongki.
